Исемдәре халыҡ хәтерендә

Ейәнсура районының тарихын яҙыу дауам итә. Башҡортостандың 100 йыллығына арнап, район тормошоноң 1917 -1940 йылдарға тиклемге осорон сағылдырған "Иңдәрендә - ил яҙмышы" китабы нәшер ителеп, Бөйөк Еңеүҙең 75 йыллығына икенсе өлөшө әҙерләнеүе хаҡында хәбәр иткәйнек инде.

Шаршамбыла үткән район ветерандар советы ултырышында 1940-60 йылдарҙы үҙ эсенә алған “Исемдәре халыҡ хәтерендә” тип аталған был китап менән уны нәшер итеү өсөн күп көс түккән район музейы директоры Миҙхәт Аҫылбаев таныштырҙы. 260 фотоны, бик күп мәҡәләләрҙе (русса, башҡортса аралашып килә) эсенә алған 360 биттән торған ҙур форматлы был китапты әҙерләүҙә “Ейәнсура таңдары” һәм “Зианчуринские зори” редакцияларының ярҙамы ҙур булыуын, башлыса гәзиттә сыҡҡан мәҡәләләр тупланыуын билдәләне ул.