-13 °С
Болотло
Бөтә яңылыҡтар
Махсус хәрби операция Спецоперация
30 Август 2025, 10:00
Тылдан ярҙам еңеүҙе яҡынайта
Тыуған яғыңдан алыҫта булғанда, ныҡ теләп тә ҡайтып булмағанда, унан килгән сәләм күңелде йылыта, ауыр саҡта көс бирә. Ейәнсура халҡы быны яҡшы аңлай һәм яугирҙәргә ҡулдарынан килгәнсе ярҙам ҡулы һуҙа. Махсус хәрби операция башланғандан алып райондан нисә тапҡыр гуманитар ылау юлланғанын, тыуған яҡ күстәнәстәренең күпме яҡташыбыҙҙың йөрәген йылытыуын инде һанап бөтөрлөк түгел. Иң мөһиме, илдәге ваҡиғаларға, ил һаҡсыларының тормошона битараф булмағандар күплеге һөйөндөрә. Уларҙың иң әүҙемдәренең береһе – Иҙелбәк ауылында йәшәүсе фермер Руслан Байбулатов.
Тылдан ярҙам еңеүҙе яҡынайта
Денис Төрөпҡолов, өлкән лейтенант, пилотһыҙ осоу аппараттары ротаһы командиры:
Яҡташтарыбыҙға гуманитар ярҙам өсөн Иҙелбәк ауылының һәр кешеһенә – ауылдаштарыма шәхсән рәхмәт белдерәм! Махсус хәрби операцияның тәүге көндәренән алып һеҙҙең берегеҙ ҙә ситтә ҡалманы. Һеҙҙең ярҙамығыҙҙы һәм тыуған Ейәнсурабыҙҙың йылыһын тоябыҙ! Бөгөн беҙ бер ҡасан да булмағанса берҙәмбеҙ! Беҙҙең көсөбөҙ һәм Башҡортостаныбыҙҙың көсө тап ошонда ла инде. Һеҙҙең алда баш эйәм!
Байбулатов Руслан Фазылйән улына йомартлығы өсөн, атап әйткәндә, миңә һәм иптәштәремә ярҙамдан ноутбук алып ебәргәне өсөн ҙур рәхмәтемде белдерәм. Бындай ярҙам хәрби рухты һәм рухи торошобоҙҙо һаҡлау өсөн ҙур әһәмиәткә эйә. Һеҙгә шәхсән үҙемдән һәм Ватаныбыҙҙы яҡлауҙа батырлыҡ күрһәткән бөтә яугирҙәрҙән ысын күңелдән рәхмәт белдерәм! Һеҙгә сәләмәтлек теләйем. Аллаһы Тәғәлә һеҙҙе изге эштәрегеҙ өсөн ҙурлаһын!
Фирҙәт Дәүләтбаҡов, ылауҙы оҙатыусы:
– Яҡташтарҙың кәйефтәре яҡшы. Яугирҙәрҙең төҙөгән блиндаждарын күреп, аптыраныҡ та, һоҡландыҡ та. Төҙөлөш материалдары ҡиммәт булғанлыҡтан, командирҙары Шамил таҡталарҙы Ейәнсуранан ҡайтып алған. Ә мунсалары... Ҡалала ла ундайҙы осратмаҫһың! Шундай таҙа, зауыҡлы итеп эшләнгән. Уларҙа хатта аквариум менән балыҡтар бар. Ғөмүмән, унда ла тормош дауам итә. Егеттәр бик ойошҡан рәүештә эшләйҙәр. Молодцы! Беҙҙең килеүебеҙгә бик шатландылар. Барғанда юлды белмәүебеҙ, бәйләнеш булмауы ҡыйынлыҡ тыуҙырғайны, кире юлға егеттәр карта төшөрөп, һыҙып бирҙе. Имен-һау йөрөп ҡайттыҡ. Миссия үтәлде!
Уны беҙ МХО башланғандан алып егеттәр өсөн ысын күңелдән янып көйөүсе итеп беләбеҙ. Бығаса үҙе лә ике тапҡыр ярҙам алып барып ҡайтҡан Руслан Фазылйән улы 21 августа сираттағы гуманитар ылауҙы оҙатты.
Руслан Фазылйән улы май аҙағында йәнә бер ҙур эшкә тотона – егеттәрҙең ғүмерен хәүефле “ҡошсоҡ”тарҙан һаҡлаусы юрған эшләүгә Ҡыуандыҡ ҡалаһына заказ бирә. Тәүге юрған әҙер булғас, тепловизор ярҙамында уны һынай. Бар талаптарға тап килеүен күргәс, кәрәкле материалдар һатып ала ла, ҙур ғына заказ эшләй. Август айына 130 юрған әҙер була. Әммә уларҙы ғына ебәреп булмай бит инде, фермер өҫтәп бензин генераторы, өс бензобысҡы һатып ала. Ауылдашы – пилотһыҙ осоу аппараттары ротаһы командиры Денис Төрөпҡоловтың үтенесен дә үтәй: уның эшен еңеләйтеү өсөн юғары ҡеүәтле, яҡшы ноутбук һатып ала.
Тиҙҙән гуманитар ылау ебәрәсәктәрен ишеткән Ҡыуандыҡ ҡалаһының “За всех!” ирекмәндәр хәрәкәте ағзалары ла ярҙамға ҡушыла, 20 маскировкалау селтәре бирә. Иҙәштәр ҙә һуңғы көндәрҙә үргән алты селтәрен ҡуша.
Уңыш йыйыуҙың иң ҡыҙған мәле булғас, етәксе хужалығын ҡалдырып китә алмай. Шуға ла ылауҙы оҙатыу кеүек яуаплы эште иң ышанған кешеләренә тапшыра:
– Улым Әхәт менән бергә Фирҙәт Дәүләтбаҡов, ике туған ағайым Салауат Байбулатов барҙылар. Улар ниндәй тәьҫораттар менән ҡайтҡандарын белһәгеҙ ине: космосҡа осҡандармы ни! Һөйләп һүҙҙәре бөтмәй, тағы ла барабыҙ, тиҙәр. Юлда гуманитар ылау менән барыусыларҙы күп осраған, хатта араларында пенсионерҙар ҙа бар, тиҙәр. Барыһы ла фронтҡа ярҙам итәбеҙ, тип тырыша – уйланырға урын бар, – ти Руслан Фазылйән улы.
Иҙелбәктәр ауылдаштарына ғына түгел, ә мөрәжәғәт иткән бер кемдең дә үтенесен кире ҡаҡмай. Улар тыуған яҡтан күстәнәс алып барған яҡташтар араһында Байыш ауылынан Шамил Ғәфүров та бар.
– Ҙур эш башҡарыусы – ылауҙы ойоштороусы Руслан Фазылйән улына, уны алып килеп еткергән егеттәргә оло рәхмәтебеҙҙе белдерәбеҙ! Иҙәш ауылы халҡы маскировка селтәрҙәре ебәргән, аяҡ-ҡулдары һыҙлауһыҙ булһын. Тәмле күстәнәстәр менән сәй эстек – күңел шатланып китте. Сөсикмәктең тәмлелеге... Элек әнейем дә күп итеп сөсикмәк бешерә ине. Егеттәр менән бала саҡты иҫләп, һөйләшеп ултырҙыҡ, – ти взвод командиры “Шома”.
Денис Шонгин, Рифат Бикмөхәмәтов, Тимур Ҡадаев, Денис һәм Рөстәм Төрөпҡоловтар, Марс Каракенов – махсус хәрби операцияла ҡатнашыусылар һаны менән дан алған Иҙелбәк яугирҙәренең бер өлөшө генә.Руслан Фазылйән улы һәм ауыл халҡы киләсәктә лә барлыҡ яҡташ яугирҙәргә ярҙамды туҡтатмай, был юҫыҡта тығыҙ эшләргә ниәтләй. Был шулай булырға тейеш тә. Сөнки тылдан ярҙам, тыуған яҡ сәләмдәре егеттәрҙең күңелдәрен күтәрә, ауыр ваҡыттарҙа яҡты киләсәккә өмөттәрен көсәйтә. Иң мөһиме, Еңеүҙе яҡынайта.
Айнә Иманғолова.
Новости партнеров