+24 °С
Ямғыр
Ауыл хужалығы Сельское хозяйство
24 Август 2022, 09:50
Уңыш йыйыу әүҙем бара
Районыбыҙ хужалыҡтарында уңыш йыйыу ҡыҙыу бара. Аграрийҙар һәр аяҙ көн менән файҙаланып ҡалырға, башаҡтарын тултырып ергә эйгән иген культураларын йыйып өлгөрөргә тырыша. Илшат Мусиндың да Яңы Николаевка ауылы янындағы баҫыуҙарында ла, ырҙын табағында ла эштәр гөрләй.
Уңыш йыйыу әүҙем бара
Әлеге ваҡытта иген культураларын йыйыуҙы тамамлап киләләр, ошо арала ҡалған 300 га ярауай бойҙайҙы йыйып алһалар, ужым бойҙайын сәсеүгә күсәсәктәр.
Был хужалыҡта ла уртаса республика күрһәткестәре кеүек үк гектарынан 30 ц тирәһе уңыш алынған. Ужым бойҙайы гектарынан 35 ц йыйылған.
Әлеге мәлдә ырҙын табағында иген таҙартыу ҡоролмаһы киске унғаса эштән туҡтамай. Риф Усманов, Хәмит Тажетдинов баҫыуҙарҙан килгән уңышты таҙартып, елгәреп келәттәргә тултырырға ярҙам итәләр.
Акрос-550 комбайындарында Әхмәт Бикйәнов менән Илнур Хәйбуллин йөрөһә, Фәнис Байчурин МАЗ-да, Рөстәм Хәсәнов Камазда һуғылған игенде ташыйҙар. Көн эсендә самалап 40 га тирәһе баҫыуҙы йыйырға өлгәшәләр.
