Беҙҙең юлдар — Аллаға шөкөр

Беҙҙең юлдар — Аллаға шөкөр

Гүзәл Ситдикова һәм Бәйтулла Фәтхуллиндың «Асыҡ студия»ла Башҡортостандағы юлдар тураһындағы тапшырыуҙарын тындағандан һуң, үҙебеҙҙең район юлдарының торошон иҫкә төшөрҙөм.

Юлдарҙа «Беларусь» тракторҙары яҙлы-көҙлө мостка ултырып үтә ал­май торғайны, машиналарын юлда ҡалдырып, ҡиммәтле йөгө булһа, шо­фер машинаһында ҡунып ҡала ине. Иҫәнғолдоң хәҙерге «Универмаг», «Аптека», «Сбербанк» алдарында оҙон ҡуныслы резинка итекһеҙ үтеп бул­маған саҡтар ҙа булды. 1980 йылдарҙа асфальтты Сибайҙан ташып, 1981-1982 йылдарҙа асфальт заводын төҙөгәндән һуң ғына Иҫәнғол урамдарын асфальт­лай башланылар.

Тапшырыу барышында юлдарының торошо бөгөнгө көндә лә насар (беҙҙең шул йылдарҙағы юлдар һымаҡ) булыуынан зарланып, күп кенә район­дарҙан байтаҡ шылтыратыусылар бул­ды. Бурандан, батҡаҡтан, хатта ауыл биләмәһе башлығы юлды тирәк йыҡ­тырып бикләп ҡуйыу сәбәпле, боль­ницаға, аптекаға ла сыға алмауҙары, ошоға тиклем грейдерҙарҙың бер тап­ҡыр ҙа үтмәүе тураһында хәбәрҙәр бик күп булды.

Бөгөнгө көндә беҙҙең районда иһә юлдар — Аллаға шөкөр, тигән фекергә килдем. Беҙҙә төпкөл ауылдар араһын­да ла ҡом һибелмәгән юлдар юҡ. Юл­дарҙың күп өлөшө асфальтланған йәки күтәртеп ҡом түшәлгән. Юлдарҙы, урамдарҙы асфальтлау әүҙем алып барыла, соҡорҙарҙы ла ямап торалар. Ҡышҡы бурандарҙан бикләнеп ул­тырған осраҡтарҙы, Иҫәнғолдағы «яңы урамдар»ҙан башҡа, ишетмәнем.

Кесе һүрәм буйындағы ауылдар араһы, урамдары һәр ваҡыт таҙартыл­ды. Көн торошона бәйле юлдарҙа өҙөк­лөктәр булманы. Яҙ еткәс кенә лә грей­дерҙар 4 тапҡыр үтте. Үрге Бикбирҙе халҡы үҙҙәренең техникалары менән төп юлға ла ҡом түшәгән ваҡыттары булды. Бөгөнгө көндә Үрге Бикбирҙе, Түбәнге Бикбирҙе ауылдары халҡы бергәләшеп, Үрге Бикбирҙе — Әсташ юлын (15-18 км) бесән алдынан, йыл да ҡом-таш түшәп ремонтлап тора­лар. Көслө ямғырҙан һуң да һәр ваҡыт йөрөрлөк була.

Юл эшсәндәренә рәхмәтебеҙҙе әйтеп, изге эштәрендә уңышлыҡтар теләйек.

Тимерғәле ИСЛАМОВ. Бикбау ауылы.