"Бөркөт"тәр эш итә бер төптән

Барлыҡҡа килеүенә бер генә йыл булған “Бөркөт” ойошмаһының эшмәкәрлеге пандемияға бәйле 65+ өсөн карантин осоронда айырыуса баҙығыраҡ төҫ алды. Һуғыш хәрәкәттәрендә ҡатнашыусылар бер ойошмаға тупланып, район хакимиәте, йәштәр бүлеге менән берлектә йәмәғәт тормошоноң уртаһында ҡайнайҙар, йәш быуынды илһөйәрлек рухында тәрбиәләүҙә туранан-тура ҡатнашалар. Район ветерандар советы ултырышында был турала “Бөркөт” ойошмаһы лидеры Илшат Батталов бәйән итте. Ҙур хыялдар менән йәшәй икән “бөркөттәр”: Таҙларҙағы кеүек, Иҫәнғолда ла Бөйөк Еңеү хөрмәтенә тау битләүендә, барыһына ла күренеп торорлоҡ итеп, яҙыу булдырырға; район хакимиәте тәҡдим иткәнсә, ҡулай быуа табып, балыҡ үрсетергә, ял зонаһы эшләргә һ.б. Әле үк Кесе Һүрәм йылғаһы буйында төҙөкләндерелгән ял итеү урыны булдырған егеттәргә изге ғәмәлдәрендә уңыштар юлдаш булһын.

Шаршамбыла үткән кәңәшмәлә МР хакимиәте башлығы урынбаҫары Тәлғәт Аҡбутин һуғыш хәрәкәттәрендә ҡатнашҡан Илгиз Шәмсетдинов менән Ринат Яковлевҡа юбилей миҙалдары тапшырҙы.

Уларҙың эшмәкәрлеге тураһында гәзитебеҙҙең киләһе һандарының береһендә уҡырһығыҙ.