Гәзит уҡыусыларыбыҙ, бәйгеләрҙән ситтә ҡалмағыҙ!

Был бәйге йыл дауамында тиерлек өйҙә ултырырға мәжбүр булған өлкәндәр, йәғни “65+”-тәр өсөн булыр. Аралашыу сикләнгәс, моғайын да һеҙҙең райондаштарға әйтер һүҙҙәрегеҙ, матур теләктәрегеҙ күп йыйылғандыр. Шуға ла бирелгән юлдарҙы дауам итеп, райондаштарҙы Яңы йыл байрамы менән ҡотлай, теләктәрегеҙҙе еткерә алаһығыҙ Иң оригиналь ҡотлаусы еңеүсе булыр һәм бүләк менән билдәләнәсәк.

Үтеп барған Сысҡан йылы тураһында таҡмаҡтар бәйгеһе иғлан итәбеҙ. Ниндәй генә булһа ла, ул тарихта үҙ эҙен ҡалдырҙы. Шуға күрә, бөтә оҫталыҡты һалып, уҙған йылда башҡарылған эштәргә, ваҡиғаларға йомғаҡ яһап, ижад емештәрегеҙҙе таҡмаҡ юлдарына һалып беҙгә ебәрергә онотмағыҙ.

Тағы бер конкурсыбыҙ “Яңы йыл мөғжизәһе!” тип атала. Һәр кем Яңы йылды көткәндә ниндәй ҙә булһа мөғжизәгә ымһына киләһе йылда яңыса, яҡшыраҡ тормошҡа өмөтләнә. Мөғжизә көтә… Мөғжизә ул ысынбарлыҡта бар… Тик беҙ уны күрә белергә кәрәк. Әйҙәгеҙ, һәр кем, үҙенең “күңел һандығын” асып, төпкә йәшерелгән, онотолоп барған Яңы йыл ваҡиғаларын тәфсирләп байҡап сыҡһын әле. “Бик шәп!” тип тапҡандарын беҙҙең гәзит уҡыусылар менән дә уртаҡлашығыҙ.