Рецепт.

Бауырҙы алма менән ҡыҙҙырып ҡарағанығыҙ бармы? Бик үҙенсәлекле, туҡлыҡлы, витаминлы ризыҡ килеп сыға.Бының өсөн 700 грамм бауыр, ике алма (әсе сорт), ике баш һуған, 150 грамм он, ике-өс аш ҡалағы үҫемлек майы, тоҙ, шәкәр кәрәк.Башта алманы йыуып, үҙәген таҙартып, түңәрәк итеп киҫәбеҙ. Һуғанды әрсеп турайбыҙ, бауырҙы йыуып ваҡлайбыҙ. Табаны йылытып, ике аш ҡалағы тирәһе үҫемлек майы һалып, алманы 5-6 минут тирәһе ҡыҙҙырабыҙ. Әҙ генә шәкәр ҡомо ла өҫтәргә мөмкин. Әҙер алманы тәрилкәгә һалабыҙ. Шул уҡ майҙа һуғанды ҡыҙҙырып һауытҡа бушатабыҙ. Бауырҙы онда әүәләп, тоҙлап , борослап, табаға көнбағыш майы өҫтәп, талғын утта 7-8 минут тирәһе ҡурабыҙ. Әҙер бауырға тәүҙә һуған, шунан алма һалып өҫтәлгә йылы килеш бирәбеҙ.Ашығыҙ тәмле булһын!