2020 йылда Башҡортостанда аҡса әйләнешендә Рәсәй Банкының 381 ялған банкнотаһы асыҡланған. Уларҙың төп өлөшө – 347-һе (90 проценттан күберәк) – 5 меңлектәргә тура килә.

2020 йылда Башҡортостандың банк өлкәһендә Рәсәй Банкының 381 ялған банкнотаһы асыҡланған. Уларҙың төп өлөшө – 347-һе (90 проценттан күберәк) – 5 меңлектәргә тура килә. 2019 йылда ялған 5 мең һумлыҡтар 80 процент тәшкил иткән. Икенсе урында, 2019 йылдағы кеүек үк, 1000 һумлыҡтар. Ундайҙар былтырғы 14 проценттан 8 процентҡа тиклем кәмеп, 29 шт асыҡланған. 2019 йылда 2000 һумлыҡтарҙың 14 ялған банкнотаһы асыҡланһа, 2020 йылда ундайҙар бары икәү булған. Ә ҡалған өлөш – төрлө номиналдағы өсәр ялған аҡса.

Рәсәй Банкы аҡса знагы менән эш иткәндә һәр ҡайһыһын кәм тигәндә өс билдә буйынса тикшерергә кәңәш итә. Һәр банкнотаның билдәләренең тулы аңлатмаһы менән Рәсәй Банкының рәсми сайтында йәки «Банкноты Банка России» мобиль ҡушылмаһында танышырға була.

Ҡулығыҙға шикле аҡса килеп эләгә икән, уны тикшереү өсөн банкка мөрәжәғәт итә алаһығыҙ. Экспертиза – бушлай.

Һөнәри эшмәкәрлеге ҡулаҡса әйләнеше менән бәйле булғандар өсөн Рәсәй Банкы махсус курстар ойоштора.

“Был бушлай һәм дистанцион курстар башлыса ваҡлап һатыусы сауҙа селтәрҙәре кассирҙары өсөн тәғәйенләнгән. Уны Рәсәй Банкы Университеты сайтында үтергә була. Курс программаһына ҡулаҡса менән эшләү, банкноталарҙы һаҡлау билдәләре, уларҙы тикшереү буйынса һәм башҡа көнүҙәк мәғлүмәт индерелгән, – ти Рәсәй Банкының Башҡортостан Республикаһы буйынса бүлеге – Милли банк идарасыһы урынбаҫары Егор Михтанюк.

Программа материалдарҙы үҙ аллы уҡып, тест һорауҙарына дистанцион яуап биреүҙе күҙаллай. Уны уңышлы үткәндәр исемле сертификат һәм эш урынына ҡуйылыу өсөн махсус знак аласаҡ.