#аш_һыу ТАУЫҠ ИТЕНӘН КӘТЛИТ

Тауыҡ итенән кәтлит

Хәҙерге көндә күптәр бройлер тауыҡтары аҫырай. Түш итен шул килеш кенә бешерһәң, ҡорораҡ була, яратып бөтмәйҙәр.

Ә был ысул менән бешерелгән кәтлиттәр өйҙәгеләргә хуш килер, тип ышанабыҙ. Самалап 400-500 г тирәһе тауыҡтың түш итен ваҡ ҡына итеп шаҡмаҡлап турайбыҙ, шуға 2-3 йомортҡа (эрерәк булһа, икәү етә), тәменсә тоҙ, онталған ҡара борос ҡушып, 2-3 өймәләмә аш ҡалағы он, йомшағыраҡ булһын өсөн 1-2 ҡалаҡ майонез, уртаса 1 һуғанды, 2-3 теш һарымһаҡты ваҡлап турап, ҡушып болғатабыҙ. Килеп сыҡҡан массаны табала ҡыҙған көнбағыш майына ҡалаҡлап һалып, кәтлит формаһы биреп, ике яҡлап ҡыҙҙырып алабыҙ. Эҫе килеш тә, һыуыҡ килеш тә тәмле була.

АШЫҒЫҘ ТӘМЛЕ БУЛҺЫН!