Был ял көнө күңелле лә, файҙалы ла үтте

Күңелле үтһен ялың - тип теләйҙәр беҙҙә ял көндәре алдынан. Ауылыбыҙҙың ҙур бер төркөм ир-аттары өсөн был ял көнө күңелле лә, файҙалы ла үтте. Ни өсөн тиһегеҙме?
Был көндө беҙ иртә таңдан Үрген ауылы мәсете янында инек. Һәм 3-4 сәғәт эсендә мәсеттең иҙән таҡталарын алып, нигеҙ тирәләй тупраҡ тултырып, яңынан иҙәнде түшәп тә ҡуйҙылар уңған ир-аттарыбыҙ. Ул ғына ла түгел, кеше күп килеү сәбәпле икегә бүленеп, бер төркөм буласаҡ мейес нигеҙен таш менән тултырып, бетон иҙмәһе менән нығытып та ҡуйҙы.

Кемдәр һуң был ир-егеттәр? Өмәне ойоштороусы, уртаһында ҡайнап йөрөүсе ауыл мәсетенең имамы Айҙар Ғәлиәхмәт улы Янбаев, һәр урамдың башлыҡтары: Тибеҙҙән Бакир Аҡсурин (Урал Ейәнбирҙин, Илдус Аҡъюлов, Илнур Азнабаев, Радик Зарипов, Риф Айҙағолов, Марат Хәлитов), Сатранан Азат Ейәнбирҙин (Фәрит Аҡсурин, Мостафа Аҡсурин), Кузнечная урамына Әкрәм Солтанбаев (кейәүе Илфат, Айрат Хәлитов, Гәрәй Аҡсурин), Йәштәр урамынан Булат Фәйзуллин (Наил Азнабаев, Илдар Түләбаев, Марат Килдебаев), Бишәйҙән Вадим Түләбаев (Илнур Ҡунаҡкужин, Әмир Искәнйәров), Мәсетле урамынан Алмаз Искәнйәров.
Мин бигерәк тә аталы-уллы Искәнйәровтарҙы айырып әйткем килә, улар тиҙ арала ике йөк тиреҫ, бер йөк таш килтереп беҙҙе эш менән тәьмин иттеләр.

Файҙалы, сауаплы эш башҡарылды. Ни өсөн күңелле булды һуң беҙгә? Сөнки эшебеҙҙең һөҙөмтәһен күреп, аралашып, күтәреңке күңел менән таралыштыҡ. Артабан да ошолай берҙәм булайыҡ ауылдаштар!