Ҡыярҙан мул уңыш алғығыҙ килһә...

Ҡыяр туҡландырыуға, тәрбиәгә бик талапсан. Улар тигеҙ булып үҫеп, яҡшы уңыш алыу өсөн, уны тейешенсә туҡландырырға кәрәк.

Ҡыяр сәскә атҡанда органика ярата, ул уны нығыта, үҫтерә. Емештәрен барлыҡҡа килтереү өсөн калий кәрәк. Был ваҡытта ҡыярҙы көл менән туҡландыралар. 1 биҙрә һыуға 1 стакан көл һалып, бер тәүлек тоторға һәм һәр төпкә 0,5 әр л һибеп сығырға. Быны ике аҙна һайын ҡабатларға ярай.

Шуға өҫтәп кесерткән төнәтмәһе әҙерләгеҙ. Бының өсөн теләһә ниндәй һауытҡа кесерткән тултырырға, йылы һыу ағыҙырға һәм әсетергә ҡуйырға кәрәк. Ферментация тиҙерәк барһын өсөн, бер ус тупраҡ һәм 1 аш ҡалағы шәкәр ҡомо өҫтәргә ярай. Бер аҙнанан файҙалы әсетке әҙер була, уны 1 биҙрә һыуға 1 л иҫәбенән ҡушып, ҡыярҙарға һибергә кәрәк.