ЯҢЫ ЙЫЛ БӘЙГЕЛӘРЕ

Дуҫтар! Йылды йомғаҡлауға ла һанаулы ғына көндәр ҡалып бара. Быйылғы йыл төрлө кисерештәр менән һәр кемдең ғүмер китабында үҙ урынын алыр. Район тормошона килгәндә, һәр ғаилә, уҡыусылар һәм төрлө өлкәләге хеҙмәткәрҙәр коллективтары, йә тотош ауыл өсөн әһәмиәткә эйә ваҡиғалар күп булды, ҡайһылары гәзит биттәрендә сағылыш тапты. Әммә яҡтыртылмаған сараларҙың бихисап икәнлеген иҫәпкә алып, “Йыл ваҡиғалары” видеояҙмалар бәйгеһен иғлан итәбеҙ.

Ағымдағы йылдың 22 декабренә тиклем “Бәйләнештә” сайтындағы “Ейәнсура таңдары” гәзитенең рәсми төркөмөндә барасаҡ бәйгенең маҡсаты 2017 йыл ваҡиғаларын барлау һәм ижади һәләтле райондаштарыбыҙҙы билдәләү. Талаптар теләге булған һәр кем үтәй алырҙай: беренсенән, һеҙҙең ҡарамаҡҡа мөһим тип табылған ваҡиға хаҡында күбендә 3 минутлыҡ видеояҙма төшөрөү; икенсенән, уны беҙҙең махсус төркөмгә (https://vk.com/tandari) ҡуйыу. Еңеүсене билдәләү өсөн бәйгелә кәм тигәндә ете бәйгесенең ҡатнашыуы шарт. Иң күп “лайыҡ” йыйыусы еңеүсе тип табыласаҡ һәм иҫтәлекле бүләк менән билдәләнәсәк.

Һеҙҙә үрҙә бирелгән һүрәт ниндәй уй-фекерҙәр уята? Уларҙы шиғри юлдарға һалып, беҙгә яҙып ебәрегеҙ. Иң тапҡыр, ҡыҙыҡлы юлдар гәзиттә донъя күрәсәк. Шәп авторҙы бүләк көтә.

Фантазияларын эшкә егеп, бирелгән шиғри юлдарҙы дауам итеү – гәзит уҡыусыларыбыҙҙың яратып ҡатнашҡан бәйгеләренең береһелер ул. Был юлы ла йоланан ситкә тайпылмайбыҙ.

Һәм

Ошо юлдарҙы дауам итеп, ҡыҙыҡлы шиғыр ижад итеп, беҙгә ебәрегеҙ. Иң ҡыҙыҡлы, шул уҡ ваҡытта мәғәнәле лә булған шиғыр авторын бүләк көтә.

Гәзит уҡыусылар өсөн “Яңы йыл минең яҙмышымда” мәҡәләләр конкурсы иғлан итәбеҙ. Өлкәндәрҙән һөйләтеп, яҙып ебәрһәгеҙ ҙә була. Иң уңышлылары баҫмала донъя күрәсәк.

Был конкурстың шарты яп-ябай: “эт” тип яҙмай, аҡбай, алабай, маъмай кеүек синонимдар ҡулланып, тоғро дуҫығыҙ – Йыл хужаһы тураһында сюжетлы хикәйә төҙөгөҙ. Шиғырҙар ҙа хуплана. Иң ҡыҙыҡлы яҙма авторын бүләк менән билдәләнәсәк.