Үргендәр сәләмәт тормош яҡлы!

Мәктәптең спортзалында 50 йәштән үткән өлкәндәр өсөн «Үргендәр сәләмәт тормош яҡлы!» тип исемләнгән спорт һәм күңел асыу байрамы булып үтте. «Йәш йөрәктәр» (Аҡсурин Бакир), «Тынғыһыҙ йөрәктәр» (Исмәғилов Айрат), «50+ Һайт-тайт» (Хәлитов Марат) командалары үҙ-ара эстафета ярыштарында көс һынашты. Һәр команда үҙенсәлекле булды, һәр ярыш төрө бик сәмле һәм көсөргәнешле үтте. Ҡатнашыусылар спорт һынауҙарынан тыш сәләмәтлек тураһында мәҡәлдәр әйттеләр, йырҙар йырланылар; көйөрмәндәр кәрзингә туп ырғытып, үҙҙәренең «ауырыған» командаларына мәрәй өҫтәнеләр. Байрам сараһы бик күңелле тамамланды,барыһы ла яңы дәрт-көс, матур бүләк алып, күтәренке кәйеф менән таралды.

Ярышта ҡатнашыусыларға, жюри ағзаларына, эстафета ярыштарын алып барыусы Ейәнбирҙин Салауат Сәми улына ҙур рәхмәт!- тип хәбәр итә Фәрзәнә Аҡсурина.