Бөтә яңылыҡтар

Сысҡан йылы бәхет, муллыҡ килтерһен!

Быйылғы йылды тарихҡа яҙып, Яңыһына аяҡ баҫыуға ла күп ваҡыт ҡалмай бара. Гәзит уҡыусыларыбыҙ, төркөмдәштәребеҙ менән ошо күңелле мәшәҡәттәр осорон тағы ла күңеллерәк, иҫтәлеклерәк итеү маҡсатында ЯҢЫ ЙЫЛ БӘЙГЕЛӘРЕ иғлан итәбеҙ! Әйҙәгеҙ, ҡатнашығыҙ, йылдың төп байрамына бүләктәр отоғоҙ!

Тиҙҙән Ҡабан йылын барлап, тамамлап ҡуйыу ваҡыты ла етеп килә түгелме? Аһ, ул мәл – Яңы йыл, бала сағыбыҙҙан алып яҡты, сағыу байрам, ҙур мөғжизә, әкиәт кеүек. Ҡабандан һуң хакимлыҡ итәсәк Сысҡан йылы ла тик яҡшы ваҡиғаларға ғына бай булһын!

“Туғанҡайым, һиңә әйтәм…”

Бирелгән фотоға елле генә исемдәр уйлайыҡ әле, дуҫтар. Шиғыр формаһында яҙылһа ла ярай. Шиғри телле, йор һүҙле, шаян гәзит уҡыусыларыбыҙҙан яуаптар көтөп ҡалабыҙ.

“Сысҡан йылы бәхет, муллыҡ килтерһен!”

Ҡәҙерле гәзит уҡыусыларыбыҙ, 2020 – Сысҡан йылы буласаҡ, шуға бәйле шиғыр яҙып, беҙгә ебәрегеҙ, рифма булыуы мотлаҡ, ҡоро һүҙҙәр теҙмәһе генә булмаһын.

“Сусҡа саҡырған сысҡанды...”

Был бәйге йор һүҙле, тапҡыр телле һәм ижад менән дуҫ гәзит уҡыусылар иғтибарына. Һеҙҙең бурыс – Сусҡа менән Сысҡан мажараларын уйлап сығарыу. Күләме һәм жанр буйынса сикләүҙәр юҡ. Әммә төп шарт шулай: бөтә һүҙҙәр ҙә тик “с” хәрефенән башланырға тейеш. Иң йөкмәткеле һәм иң күп һүҙҙәр ҡулланып яҙылған эштәрҙең авторҙары еңеүсе тип табыласаҡ. Әйҙәгеҙ, дуҫтар, әүҙемерәк!

“Иҫтә ҡалған Яңы йыл”

Беҙҙең халыҡта әйбер хәтере һаҡланмаһа ла, гел йылмайып йә һағышланып иҫкә алыр иҫтәлектәре етерлек. Был бәйге хәтирәләр ебен һүтергә бынамын тигән сәбәп. Әйҙәгеҙ, уларҙы беҙҙең гәзит уҡыусылар менән дә уртаҡлашығыҙ! Иң-иң мәҡәлә авторҙарын шәп бүләктәр көтә.

Хаттарығыҙҙы редакцияға, Иҫәнғол ауылы, Совет урамы, 9 һәм zori32@yandex.ru адрестары буйынса, йәки “Бәйләнештә” селтәрендәге “Ейәнсура таңдары” гәзите төркөмөнә https://vk.com/tandari 25 декабргә тиклем ебәрегеҙ. Иң ҡыҙыҡлы, йә фәһемле йөкмәткегә эйә булған яҙмалар гәзит биттәрендә донъя күрәсәк, ә авторҙарын бүләк көтә. Башланыҡ!