Матбуғат – 2021 Төп приз – 100 литр бензин Өҫкәлек буйҙарына юллана!

2021 йылдың тәүге яртыһына ваҡытлы матбуғатҡа яҙылыу башланыу менән ике тапҡыр акция иғлан ителде, йәғни 2020 йылдың октябрендә һәм декабрҙә 15 процент ташлама менән гәзит-журналдарға яҙылыу мөмкинлеге бирелде. Беҙҙең тоғро дуҫтарыбыҙ араһында был мөмкинлекте файҙалана алыусылар күп. Бик шатбыҙ, гәзит уҡыусыларыбыҙ, тормоштоң ауырлығына ҡарамай, беҙҙең менән ҡалыуығыҙға. Матди байлыҡ ғүмерлек түгел, ғөмүмән, ул бер ҡасан да мәңгелек булмаған, уйламағанда-көтмәгәндә юҡҡа сығыуы ихтимал. Ә рухи байлыҡ һәр саҡ һеҙҙең менән. Белемеңдең тәрәнлегенән, күңелеңдең таҙалығынан һинең бәхетең, яҙмышың, тормошоң төҙөлә. Шуға күрә рухи үҫешкә ҙур иғтибар биреп, “Ейәнсура таңдары”на яҙылғанығыҙға рәхмәт белдерәбеҙ.

25 декабрҙә түҙемһеҙлек менән көтөп алған сара – “Ейәнсура таңдары” гәзитенә 2021 йылдың тәүге яртыһына һәм тулы йылға яҙылыусылар араһында бүләк уйнатыу уҙғарылды.

Редакция хеҙмәткәрҙәре йәшниккә төшөрөлгән 678 квитанцияны ҡарап, ҡабатланғандарын алып (ундайҙары ла булды), һәр береһен төрөп әҙерләне, бағыусылар ярҙамында алынған бүләктәр сығарып теҙелде. Шундай эштәрҙән һуң Яңы йыл кәйефенә тап килтерергә тырышып биҙәлгән редакция фойеһында бүләк уйнатыу башланды. Район мәҙәниәт йорто хеҙмәткәре Фәйрүзә Хәсәнова сараны алып барҙы, ә “Ләйсән” балалар баҡсаһы тәрбиәләнеүсеһе Әмилә Йомаҙилова даланлыларҙы асыҡларға ярҙам итте. “Бәйләнештә” селтәрендә “Ейәнсура таңдары” гәзите төркөмөндә тура эфирҙа барған сараны ҡарап барыусылар иғтибар иткәндер, моғайын: был юлы беҙҙең еңеүселәребеҙ быға тиклем бүләк уйнатыуҙа ҡатнашып та бер тапҡыр ҙа отмағандар һәм беренсе тапҡыр бәхеттәрен һынап ҡараған гәзит уҡыусыларыбыҙ араһынан булды. Беҙ бик шатбыҙ һеҙҙең өсөн! Приз уйнатыуҙа иң күп ҡатнашыусылар Иҫәнғол ауыл биләмәһенән– 161 квитанция, икенсе урында – Үрген ауыл биләмәһе (40 квитанция), өсөнсө урын муйнаҡтарҙа (37 квитанция). Беҙ, әлбиттә, пандемияға бәйле, квитанцияларҙы Ватсапта ла, “Бәйләнештә” төркөмөндә лә ҡабул иттек.

Шулай итеп еңеүселәрҙең исемлеген түбәндәге таблицала бирәбеҙ.

Еңеүселәрҙе ҡотлайбыҙ! Ә кемдәрҙең квитанциялары сыҡмаған, күңелһеҙлеккә бирелмәгеҙ тибеҙ, уйын бит был!

Һәм, ихлас күңел менән беҙгә ошо сараны үткәреүҙә ҙур ярҙам күрһәткән“Ейәнсура таңдары” гәзите бағыусыларын һеҙҙең иғтибарға бирәбеҙ:

– “Республика Башкортостан” Нәшриәт йорто;

– ШЭ Рәхим Мәһәҙиев;

– ШЭ Никита Мананников;

– ШЭ Айгөл Әбделхәйерова (“Аллея роз” интернет-магазины);

– Нәфис Мәсәғүтов (“Зенит” ЯСЙ-һы);

– ШЭ Луиза Рәхмәтуллина;

– МР хакимиәте башлығы Дәмин Юланов;

– Роберт Сырлыбаев (мәғлүмәт-консультация үҙәге етәксеһе).

Ауыл биләмәләре башлыҡтары: Сабит Фазлыев (Үтәғол), Нурғәле Бикбулатов (Абзан), Айҙар Ҡуланшин (Байыш), Наил Яҡшығолов (Һаҡмар), Илгиз Йылҡыбаев (Таҙлар), Рәмил Юлсанов (Бикбау), Хөрмәтулла Ҡотошев (Әбүләис), Фидан Йәркәев (Ҡаҙанболаҡ), Шәһит Ҡолмөхәмәтов (Байдәүләт), Мәүлет Шәрипов (Һүрәм) һәм Даян Атнағолов (Муйнаҡ).

Беҙ уларҙың һәр береһенә рәхмәт белдерәбеҙ, Яңы йылда яңы уңыштар, ныҡлы һаулыҡ, ғаилә именлеге теләйбеҙ!