"ТӘГӘРМӘСЛЕ КЛУБ" ТА КИЛЕР

“Клубтар төҙөләсәк ауылдарҙа халыҡ иҫәбе бер меңгә тиклем булырға тейеш. Был биналар күп функциялы – шулай уҡ китапхананы, видеоҡоролмалы уңайлы залды, балалар сәнғәт мәктәбе филиалдарын үҙ эсенә аласаҡ”, – тип белдерҙе республиканың мәҙәниәт министры Әминә Шафиҡова. Ул тәүге клубтарҙың ошо йылдың декабрендә үк Ҡыйғы, Салауат райондарында барлыҡҡа киләсәген әйтте.

Өҫтәүенә 2024 йылға тиклем 20 заманса моделле китапхана һәм ун автоклуб буласаҡ. Министр аңлатыуынса, бында “тәгәрмәсле клубтар” хаҡында һүҙ бара. Улар яҡтылыҡ, тауыш һәм видеоҡоролмалар менән йыһазландырылған. “Тәгәрмәсле сәхнә”ләр халҡы 300 кешегә тиклем булған ауылдарға йөрөп тамашалар күрһәтәсәк.

Милли проектҡа ярашлы шулай уҡ быйыл республиканың ун муниципалитетында берешәр яңы кинозал булдырыу планлаштырыла.

“Маҡсатлы күрһәткестәрҙә йылына икәү асыу ҡаралған ине, беҙ заявка биреү мәлендә әүҙем эшләп, һанды күбәйтеүгә өлгәштек. Финанслауҙы биш тапҡыр күберәк алдыҡ”, – тине министр.

Билдәле булыуынса, “Мәҙәниәт” милли проекты “Мәҙәни мөхит!, “Ижади кешеләр”, “Һанлы мәҙәниәт” бүлексәләренән тора. Ил буйынса иң күп сумма тәүгеһе өсөн бүленә – 84 миллиард һум. Әминә Шафиҡованың һүҙҙәренсә, Башҡортостанда милли проектты тормошҡа ашырыу 9 миллиард һумдан ашыуға төшәсәк.

https://eylistan.rbsmi.ru/articles/redaktsiya/t-g-rm-sle-klub-ta-kiler/