Хәким Мортазин атлы егет

25 йыл сәхнәлә

Быйылғы йыл Рәсәйҙә һәм Башҡортостанда Театр йылы тип иғлан ителде. Был тылсымлы театр донъяһындаа оҙаҡ йылдар уңышлы эшләп йөрөүсе яҡташтарыбыҙ араһында Яңыбай ауылынан Хәким Мортазин исеме лә бар. Ошо көндәрҙә Хәким Фәрит улы театр донъяһында хеҙмәт итеүенең 25 йыллыҡ юбилейын билдәләй. 2010 йылда БР-ҙың атҡаҙанған артисы исемен алған Хәким Мортазин әле М.Ғафури исемендәге башҡорт академия драма театрында эшләй, унан алда күп йылдар Салауат драма театрында көс түккән.

Әйткәндәй, Хәким Мортазин Ҡансуриндар араһынан, бары бер заман был фамилия күбәйеп бара, тип исемдән фамилия яһау дәүерендә, Мортаза исемле олатай исеменән Мортазин фамилияһы барлыҡҡа килә.

Бала саҡта кемдең кем булырын асыҡ ҡына күҙ алдына килтереп булмайҙыр. Хәким дә мәктәп йылдарында халыҡ алдына сығып шиғыр ҙа һөйләргә оялыуын, белем усағындағы драма түңәрәгенә саҡырһалар ҙа, ҡырҡа баш тартыуын йылмайып хәтерләй. Шулай ҙа сәнғәткә һөйөү юҡтан яралмағандыр, атаһының клуб мөдире булып (унан алда тракторсы, бригадир, аҙаҡтан сәләмәтлеге насарайыу сәбәпле клуб мөхитенә эшкә инә) яҡшы ғына эшләүен һөйләүҙәре күңеленә һәйбәт орлоҡтар һалғандыр. Атаһы Фәрит ағай ихласлап ансамбль төҙөй, һәүәҫкәрҙәр менән спектаклдәр ҡуялар, сәхнә костюмы, интерьер хәстәрләй, хатта “Урман шаулай” атамалы пьесаны ҡуйыу өсөн ысын немец автоматтарын таба. Үкенескә күрә, Хәкимдең атаһы малай бик кесе саҡта мәрхүм була. Мортазиндың юморға оҫталығы атаһынан күскән дә инде – халыҡ Фәрит ағайҙың спектаклде биҙәү өсөн төрлө ҡоштар булып һайрауын, тормошҡа яратып бағып, уны матур итеп йәшәргә ынтылыуын да белә.

Әсәһе Зилә Ғәлимйән ҡыҙы һауынсы булып эшләй, район Советы депутаты ла була, күберәк шулай дәүләт эшендә йөрөй. Хәкимгә күбеһенсә йорттағы ололар тәрбиәһендә үҫергә насип була. Өләсәһе – сығышы менән Шишмә районынан булған, матур ғына итеп татарса һөйләшкән теремек инәй ҙә ейәнендә халыҡ ижадына хөрмәт тәрбиәләй. Профессиональ һәм арҙаҡлы артистка Зәйтүнә Бикбулатова Хәким Мортазинға бишенсе быуын туғанға тура килә. Хәсән ҡартатаһы, Ғәзиз олатаһы һуғыштан ғаиләләренә таҡмаҡлап шиғри хаттар яҙған, шулай булғас, нәҫелдә талант, әлбиттә, булған.

Тулыһынса гәзиттә уҡығыҙ.