Каникул дауам итә

4 ноябрь көнө илебеҙ Халыҡтар берҙәмлеге көнөн билдәләй. Был байрам Рәсәй халҡының сағыу хәрби йолаларын таныуҙы, уларҙың батырлығын һәм ҡаһарманлығын, дәһшәтле ҡурҡыныс килеп тыуғанда туплана белеү оҫталығын хәтерҙә тотоуҙы күҙаллай һәм төрлө милләт вәкилдәренең берләшеү билдәһе булып тора. Республикабыҙҙағы берҙәмлек - милләттәрҙең килешеп, дуҫ-татыу йәшәүе тигән һүҙ. Тарихтан күренеүенсә халыҡтарҙың берҙәмлеге ауырлыҡтарҙы еңеп сығырға, алға барырға, үҫергә көс биргән. Трушин ауылы китапханаһында балалар менән "Аманат" журналында баҫылған дуҫлыҡ, берҙәмлек тураһында шиғырҙар, ауырлыҡтарҙы еңеп сығырға ярҙам итеү тураһында хикәйәләр менән таныштыҡ, уҡыныҡ, үҙ фекерҙәребеҙҙе белдерҙек. Дуҫлыҡ тураһында йомаҡтар ҡойҙоҡ һәм мәҡәлдәр уҡыныҡ.