-5 °С
Болотло
Бөтә яңылыҡтар
Милли проект Нацпроекты
15 Август , 11:05
Милли көрәш - ата-бабаларыбыҙ мираҫы
Спорт, физик әүҙемлек сәләмәтлек йәһәтенән генә түгел, тәрбиәүи яҡтан да әһәмиәтле. Быны Рәсәй, Башҡортостан чемпиондары тәрбиәләгән Муйнаҡ мәктәбе миҫалында ла күрергә була – көрәш менән етди шөғөлләнгән егеттәрҙең 98 проценты юғары белем алған. Хәҙер улар матур ғаилә ҡороп, төрлө урындарҙа уңышлы эшләй.
Милли көрәш - ата-бабаларыбыҙ мираҫы
Ҡасандыр Хөрмәт Исмәғилев башланғыс һалған көрәш мәктәбе ҙур тарихҡа эйә. Ә 2020 йылда ул яңырыу кисерҙе. Республика етәксеһе башланғысы менән Башҡортостанда тормошҡа ашырылған “Спорт көрәше – мәктәптәргә” проекты буйынса бында көрәш келәме, стеналарға “һаҡлағыстар”, манекендар, гимнастика өсөн маттар, турниктар менән йыһазландырылған махсус зал асылды. Йәш көрәшселәр Республика көнө һәм райондың 90 йыллығы уңайынан бындай ҙур бүләкте республиканың тағы 45 мәктәбе менән берлектә ҡабул итеп алды. Спортсыларҙы һәм уларҙың тренерҙарын онлайн бәйләнеш аша Республика Башлығы Радий Хәбиров ҡотланы һәм спортсыларға уңыштар теләне.
Етәкселәре Илнур Әбделғужин әйтеүенсә, хәҙер йәш спортсылар милли көрәш менән бер рәттән бер нисә көрәш төрөн үҙләштерә. Һәм һөҙөмтәләр һөйөндөрә. Иң-иңдәрен генә атап үткәндә, 2023–2024 уҡыу йылында Әбйәлил районында уҙған грек-рим көрәшендә үҙ ауырлыҡ категорияларында Аслан Солтанбаев менән Дамир Ишбаев – беренсе, ә команда өсөнсө урынға сыҡҡан. Дамир шулай уҡ Көйөргәҙе районында милли көрәш буйынса асыҡ турнирҙа һәм Стәрлебашта уҡыусылар араһында уҙғарылған милли көрәш буйынса 26-сы спартакиадала еңеүсе булған. Ә Аслан иһә грепплинг буйынса Башҡортостан беренселегенә уҙған турнирҙа Урал аръяғы зонаһында, Йылайыр районында уҙған милли көрәш буйынса Урал аръяғы турнирында, Көйөргәҙе районында Рәсәй чемпионы И. Исмәғилевҡа арнап уҙғарылған турнирҙа ла беренселеккә сыҡҡан. Бына шулай яҡшы һөҙөмтәләр бирә “Көрәш” милли көрәш буйынса өҫтәмә белем биреү үҙәге егеттәре.
Айгөл Ҡылысбаева.
Айнә Иманғолова фотоһы.
Хөрмәт Исмәғилев, милли көрәш, самбо һәм дзюдо буйынса спорт мастерлығына кандидат:
– 1985 йылда мәктәп директор Булат Ишемйәров мине – яңы ғына институт бөтөп ветврач булып эш башлаған белгесте, һабантуйҙарҙа көрәшеп, урындар алып йөрөүемде күреп, мәктәптә көрәш секцияһы асырға саҡырҙы. Иҫке мәктәптә спортзалда ҡара ер, интернаттан матрастар алып башлап ебәрҙек. Унан минән тренерлыҡты тәрбиәләнеүсем Илнур Әбдедғужин ҡабул итте. Рәфис Ғайсин, Фәнил Ишмөхәмәтов та эшләне.
Муйнаҡта махсус клуб асыу бик дөрөҫ, артабан да эш был юҫыҡта дауам итһен. Мәктәптә интернат булғас, Мәзит, Ғәббәс, Өмбәттән дә балалар килә. Егеттәр интернатта буш ятҡанса, спорт менән шөғөлләнер. Өҫкәлек буйы данын республикаға танытҡан, көслө, таһыллы, матур уйын күрһәткән көрәшселәр үҫеүен дауам итһен.
Әлеге ваҡытта “Көрәш” милли көрәш буйынса өҫтәмә белем биреү үҙәгендә 41 уҡыусы шөғөлләнә, шуларҙың 28-ҙе малайҙар, ҡалғаны – ҡыҙҙар. Йәш көрәшселәр киләсәктә лә һынатмаҫ, Ейәнсураны данлап, яңы үрҙәргә күтәрелер!
Читайте нас:
© "Ейәнсура таңдары" сайты, 2020-2024
Гәзит Элемтә, мәғлүмәт технологиялары һәм киң коммуникациялар өлкәһендә күҙәтеү буйынса федераль хеҙмәттең Башҡортостан Республикаһы буйынса идаралығында теркәлде. ПИ ТУ02-01355-се һанлы теркәү тураһында таныҡлыҡ 2015 йылдың 10 июлендә бирелгән.
Баш мөхәррир: Ә.М. Әйүпова.