“Яратҡан эш бәхетле итә”

– Бәләкәй саҡта тешемде дауаларға барырға нисек ҡурҡыуымды белһәгеҙ... Ике-өс тапҡыр булғанмындыр инде, ә иҫемдә ныҡ ҡалған. Ул ваҡытта яҙмыш ошо һөнәр менән бәйләр, тип кем уйлаған, – ти көлөп Алина Фәрғәт ҡыҙы.

Трушин ауылы ҡыҙы стоматолог булырға Стәрлетамаҡтағы В. Ленин исемендәге 2-се лицейҙың 11-се класында уҡығанда ҡарар итә. Тик юғары уҡыу йортона инергә балдары етеңкерәмәй. Аптырап ҡалмай: Өфөләге БДМУ янындағы медицина колледжына уҡырға инә. Диплом алғас, районға ҡайтып “Евродент” стоматология клиникаһында теш технигы булып дүрт йыл эшләй. Был осорҙа теш табибы булыу теләге көсәйгәндән-көсәйә генә. Алина Фәрғәт ҡыҙы Ырымбур медицина университетына уҡырға инә. Биш йылдан диплом алып ҡайтып, клиникала стоматолог-терапевт булып эшләй башлай.

Үткән йәй Алина өсөн бик иҫтәлекле булған. Ибрай егете Адель менән ғаилә ҡорғандар. Йәш белгес район үҙәк дауаханаһына эшкә күскән һәм  “Ауыл табибы” программаһы сиктәрендә грантҡа ла эйә булған. Эше менән бик ҡәнәғәт. Дауахананың йәмәғәт тормошонда ла ҡайнай,  шәп спортсы булараҡ, төрлө ярыштарҙа әүҙем ҡатнаша.

Кеше эше менән матур, тип юҡҡа әйтмәйҙәрҙер. Алина Фәрғәт ҡыҙына рәхмәтле пациенттар, уңыштар, яңы үрҙәр теләйбеҙ.

Айнә Иманғолова.

Автор фотоһы.