Хыялдағы уңайлыҡтар хәҙер ысынбарлыҡ

Республика һуңғы йылдарҙа һаулыҡ һаҡлауҙың беренсел звеноһын уңышлы яңыртты: 500 фельдшер-акушерлыҡ пунктын алмаштырылды, күп объекттар төҙөкләндерелде. Әбүләйес ауылында бығаса ауыл мәктәбендә урынлашҡан фельдшер-акушерлыҡ пункты өр-яңы модулле бинаға күсте.

– Быға тиклем халыҡ, сират булған осраҡта, һыуыҡ коридорҙа көтөргә мәжбүр ине. Хәҙер ҡыуанып бөтә алмайҙар. ФАП 10 көн эсендә төҙөлдө. Барлыҡ ауылдаштар ҙа ҡулдан килгәнсе ярҙам итте. Ирҙәр – өмәләрҙә, ҡатындар, бина әҙер булғас, таҙартыу-йыуыу эштәрен ихлас башҡарҙы. Ҙур рәхмәт уларға! – ти 35 йылдан ашыу ауылдаштары һаулығы һағында тороусы фельдшер Гөлнара Мусина.

Йылы, яҡты бина, ЭКГ аппараты, глюкометр, стерилизатор, яңы һыуытҡыстар, акушер креслоһы, өҫтәл, ултырғыстар – рәхәтләнеп эшлә генә. Гөлнара Марат ҡыҙының ҡыуанысын уртаҡлашып, хатта тормош иптәше аяҡ кейемдәре өсөн кәштә, улы шкаф бүләк иткән. Эстә урынлашҡан бәҙрәф, һыуыҡ, йылы һыу, канализация – был уңайлыҡтар ҙа ҡасандыр хыялда ғына булған.

– Яңы бина өсөн республика һәм район етәкселегенә бик рәхмәтлемен. Артабан да халыҡ һаулығы һағында тырышып эшләрмен, – ти фельдшер.

Айнә Иманғолова.

Хөрмәтулла Ҡотошов, Әбүләйес биләмәһе башлығы:

– Ауыл халҡы яңы ФАП менән бик ҡәнәғәт. Заманса йыһазландырылған өр-яңы бина, күп йылдар эшләүсе фельдшер Гөлнара Марат ҡыҙының тәжрибәһе, уңайлы мөмкинлектәр Әбүләйес ауылы халҡының һаулығын нығытыуға бик ҙур ярҙам булыр, тип ышанабыҙ.