15 йәшлек водителгә ҡарата бер нисә протокол төҙөлгән

Райондың юл хәүефһеҙлеге инспекторҙары профилактик рейдтар барышында эскән килеш рулгә ултырған 15 йәшлек үҫмерҙе тотҡан. 

Геологоразведка ауылында ВАЗ-2107 автомобилен туҡтатырға маташҡан инспекторҙарҙың талабын һанға һуҡмай, водитель ҡасырға тырышҡан.

Инспекторҙар туҡтатҡас, водителдең документтары булмай сыға. Яуаплылыҡтан ҡасып, үҫмер ағаһының мәғлүмәттәрен еткерә.

Спиртлы эсемлеккә тикшереү үткәс, прибор 0,579 мг/л күрһәтә.

Шулай ҙа үҫмер үҙенең кемлеген таныта һәм атаһының машинаһын рөхсәтһеҙ алыуын әйтә.

Бынан һуң ата-әсәһе саҡыртыла. Водителгә ҡарата бер нисә протокол төҙөлә. Материалдар бәлиғ булмағандар эштәре буйынса комиссияға ебәрелгән.