АУЫЛДАР ТӨҘӨКЛӘНДЕРЕЛӘСӘК

Башҡортостан Республикаһы Хөкүмәте йортонда “2018-2022 йылдарға ҡала мөхитен формалаштырыу” өҫтөнлөклө проекты буйынса ведомство-ара комиссияның сираттағы ултырышы булып үтте.

Башҡортостанда өҫтөнлөклө проектты ғәмәлгә ашырыу тураһында Башҡортостан Республикаһы Торлаҡ –коммуналь хужалығы министры урынбаҫары Альфред Зиннәтуллин сығыш яһаны. Уның белдереүенсә, әле 2018-2019 йылдарға тәү сиратта төҙөкләндереүҙе талап иткән йәмәғәт биләмәләрен асыҡлау өсөн рейтинг тауыш биреү буйынса эш алып барыла.

Республиканың 20 меңдән ашыу халыҡ йәшәгән ҡала һәм ҡала биләмәләре тәү сиратта төҙөкләндереүҙе талап иткән дөйөм йәмәғәт урындарын үҙҙәре һайлап ала ала.

Торлаҡ-коммуналь хужалыҡ министрлығында белдереүҙәренсә, 9 февралгә тиклем тәү сираттта төҙөкләндереүҙе талап иткән дөйөм йәмәғәт урындарын – сквер, парк, һыу буйҙары һәм башҡалар, халыҡ үҙе тәҡдим итә ала. Бының өсөн муниципаль берәмектәрҙең рәсми сайтында “Ҡала мөхите” проектына бағышланға айырым бүлек бар.

Тауыш биреү республиканың 23 тораҡ пункты – Өфө, Стәрлетамаҡ, Салауат, Нефтекама, Октябрьский, Күмертау, Туймазы, Бәләбәй, Бөрө, Благовещен, Яңауыл, Дүртөйлө, Баймаҡ, Сибай, Учалы, Ишембай, Приютово, Шишмә, Белорет, Межгорье, Ағиҙел, Мәләүез, Дәүләкән ҡала-ҡасабаларында 18 мартта буласаҡ.

Әле үк хакимиәттәрҙең сайттарында аҡсаны ҡайһы объектҡа йүнәлтеү йомғаҡтары күрһәтелгән. Мәҫәлән, Стәрлетамаҡ ҡалаһында Стәрле һәм Ольховка йылғалары буйҙарын төҙөкләндереү, шулай уҡ ҡаланың бер нисә паркын һәм йәйәүлеләр йөрөй торған урындарҙы төҙөкләндерәсәктәре билдәле булды. Салауат ҡалаһында иһә Ленин урамындағы Аллеяны һәм Батырҙар Аллеяһын, ҡала дауаханаһы биләмәһен, ҡала паркын, пляжды, Салауат Юлаев бульварындағы фонтанды, ҡала скверын һәм башҡа объекттарҙы төҙөкләндереү ҡарала.

2018 йылда республикала “Ҡала мөхитен формалаштырыу” проектын бойомға ашырыу өсөн 1 миллиард һумдан ашыу аҡса йүнәлтеү ҡаралған. Шуның 891 миллион һумы федераль, 175 миллион һумы республика бюджетынан йәлеп ителәсәк.

2017 йыда был программа буйынса 23 муниципаль бермәмектә 416 ихата һәм 37 йәмәғәт урыны төҙөкләндерелде. 2018 йылда Башҡортостандың 63 муниципаль берәмеге лә был проектты ғәмәлгә ашырыуҙа ҡатнаша.

Ейәнсура район муниципаль район хакимиәте башлығының төҙөлөшө буйынса урынбаҫары Мөнир Ваһапов:

- 2018-2022 йылдарҙа “Ҡала мөхите” өҫтөнлөклө проекты сиктәрендә райондың 5 ауыл биләмәһендә 13 ихатаны һәм 12 йәмәғәт урындарын, йәғни парк, сквер һәм башҡаларҙы төҙөкләндереү күҙаллана.

Быйыл программа буйынса Иҫәнғол ауылының күп фатирлы йорттарының ике ихатаһына (Төҙөүселәр урамы, 26-сы һәм 28-се йорттар, Нефтселәр урамы, 21-се йорт, Һ. Дәүләтшина урамы, 1-се һәм 1-се а йорттары) асфальт түшәү, яҡтыртҡыстар ҡуйыу һәм “Дуҫлыҡ” паркын төҙөкләндереү планлаштырыла.