Ауыл халҡын хәстәрләп

РФ Һаулыҡ һаҡлау министрлығы күсмә фельдшер-акушерлыҡ пункттары булдырылып, улар аҙ халыҡ йәшәгән ауылдарҙы хеҙмәтләндерәсәге тураһында хәбәр иткәйне. Яңыраҡ тәүге тапҡыр Башҡортостандың алты районы күсмә ошондай ФАП-тар менән йыһазландырылды. Был "Һаулыҡ һаҡлау" милли проекты сиктәрендә һатып алынған мобиль ҡоролма Баймаҡ, Белорет, Әбйәлил, Бөрйән, Йылайыр райондарына, һәм иң мөһиме – беҙҙең районға ла ҡайтарылды.

"ПАЗ" автобусы базаһында эшләнгән күсмә ФАП барлыҡ кәрәкле ҡоролмалар: электрокардиограф, кардиомаркер өсөн кәрәкле портатив экспресс-анализатор, дефибриллятор-монитор, гинекологик кресло, анализ алыу һәм башҡа медицина ҡоролмалары менән йыһазландырылған.Тиҙҙән ул үҙҙәренең тәүге пациенттарын ҡабул итә башлаясаҡ.