Тырыштарға уңыш үҙе юлдаш

Буранғол ауылында тыуып-үҫкән Алик Айбик улы мәктәптән һуң класташтары менән урындағы һөнәрселек лицейына уҡырға килгән. Иретеп йәбештереүсе һөнәренә уңышлы уҡып сыға ла, баш көлләй ошо эшкә сума. Вахта менән Өфөлә, Татарстанда, алыҫ Себер тарафтарында һәм Ырымбур өлкәһендә эшләргә тура килә уға.

Әммә былай ситтә йөрөү ялҡыта. Ҡатыны Әлиә һәм балалары Алмас, Аделина һәм Аскарҙы оҙаҡҡа ҡалдырып киткеһе лә килмәй башлай. Әлиә менән кәңәшләшеп, адреслы социаль ярҙам алып ҡарарға булалар. Тиҙ арала мәшғүллек үҙәгенә кәрәкле документтар туплап тапшыралар. Һөҙөмтәлә уларҙың проекты хуплана һәм тырыш егет үҙ эшен асып ебәрә.

-250 мең һумлыҡ ярҙам аҡсаһына тәү сиратта яҡшы иретеп йәбештереү аппараты, тимерҙе бөгөү өсөн ҡулайлама алдым. Шулай уҡ “болгарка”, “резак” кеүек башҡа инструменттар ҙа тупланым. Башлап ебәргәндә асыҡ һауала эшләргә тура килде. Аҙаҡ ҙур гараж төҙөп, бер яғын оҫтахана итеп алдым. Хәҙер йылыла, ҡорола эшләйем. Инде өс йылдан артыҡ яратҡан эшем менән шөғөлләнәм. Айырыуса йәй көнө заказдар күп, өлгөрә алмай китһәм ярҙамсы алырға тура килә. Улым Алмас та буш ваҡытында ярҙам итә, – ти Алик Ейәнғолов.

Ябай ғына тимер ҡойма-ҡапҡаларҙы семәрләп биҙәп ҡуйған оҫтаның эштәре халыҡ араһында тиҙ танылыу тапҡан.  Ул эшләгән матур беседкалар, мангалдар, мунса мейестәре, эскәмйәләр, ҡапҡалар, ҡоймалар  район үҙәгендә генә түгел, яҡын-тирә ауылдарҙа ла, хатта күрше райондарҙа ла бихисап. 

Зәлиә Байғусҡарова.