Әбүләйестәрҙең хыялы тормошҡа ашты

Фельдшер-акушерлыҡ пункты күптән яңыртыуҙы һораған. Быйыл был эшкә “Уралпромоборудование” ойошмаһы эшселәре тотоноп, свайҙар ҡатҡан, нигеҙ әҙерләгән. Шул уҡ ойошма модулдәрҙе йыйып, башын ябып ултыртҡан. “Гранд” йәмғиәте (етәксеһе Эдуард Шәрипов) иһә сантехник ҡоролмаларҙы урынлаштырған, һыу үткәргән. “Радуга” ойошмаһы (етәксеһе Риф Хәлитов) бинаны тыш яҡтан ҡойма менән уратып алған. Бына шулай күмәк көс менән эҙ уңышлы ғына башҡарылған.

Яңы медицина пунктын асыу тантанаһында мәртәбәле ҡунаҡтар –  Башҡортостан Республикаһының Дәүләт Йыйылышы – Ҡоролтай депутаты Рәил Әбдрәхимов, район башлығы Дәмин Юланов, Ейәнсура районы башлығының социаль мәсьәләләр буйынса урынбаҫары Марат Мөхәмәтов, Иҫәнғол үҙәк район дауаханаһы баш табибы Владислав Ваһапов һәм ауыл халҡы ҡатнашты. Ал таҫманы ҡырҡыу хоҡуғы Рәил Рамаҙан улы, Дәмин Марат улы һәм Владислав Радик улына бирелде.

Яңы бина яңы инде: яҡты, йылы бүлмәләрҙән сафлыҡ бөркөлөп тора. Ауырыуҙарҙы ҡабул итеү өсөн бар уңайлыҡтар ҙа булдырылған. Өр-яңы мебель, һыуытҡыс, инструменттарҙы зарарһыҙландырыу, буй, ауырлыҡ үлсәү ҡоролмалары урынлаштырылған. Ҡатын-ҡыҙҙарҙы ҡарау өсөн айырым бүлмә булдырылған. 35 йыл ауылдаштары һаулығы һағында торған фельдшер Гөлнара Мусинаға бындай пунктта эшләүе күпкә уңайлыраҡ буласаҡ.

Зәлиә Байғусҡарова.

Автор фотоһы.