Ярыш сәме тынманы

Шәмбе көнө, 13 апрелдә, «Салауат» физкультура-сәләмәтләндереү комплексында район үҙәге учреждениелары һәм ойошмалары араһында спартакиада үткәрелде. Унда 13 команда көс һынашты. Әйткәндәй, бығаса бер ҡасан да команда ҡуймаған Ейәнсура мәғлүмәт үҙәге (редакция) коллективы ла ҡатнашты.

«Сәләмәтлек булған ерҙә

Рух ныҡлығы ҡаҡшамаҫ.

Еңеү ҡомары булғандарҙы

Дәрт һәм дарман ташламаҫ!» – тип башланы бәйгегә йыйылған командаларҙы сәләмләп алып барыусылар Сәүиә Йәнсурина һәм Илһам Хәсәнов. Тантаналы шарттарҙа команда капитандары БР дәүләт флагын күтәргәндән һуң байрам асыҡ тип иғлан ителде.

Спартакиадала ҡатнашыусыларҙы район хакимиәте башлығы Дәмин Юланов тәбрикләне. Ул йыл да үткәрелгән бәйгелә командалар һаны бығаса аҙ булыуын, быйыл иһә байтаҡҡа артыуын билдәләп, барыһына ла сәләмәтлек, уңыштар, еңеүҙәр теләне. Был көндө ФСК умарта күселәй гөж килеп торҙо. Көсөргәнешле ярыш барышы социаль селтәрҙәрҙә яҡтыртылып барҙы. Шулай итеп, тәүге уйында мәргәндәр сәпкә тейгеҙеп ярышты. Дартс буйынса бәйгелә 1-се урын – Рәзилә Аҡҡужинала, Юнир Юлдашбаевта («Дозор» ЯСЙ-һы). 2-се урын – Айгөл Мырҙабаева һәм Эмиль Юлдашбаевта (КЭС). 3-сө урын – Эльвина Итбаева һәм Заһир Хоҙабәндинда (1-се һанлы Иҫәнғол мәктәбе).

Пневматик винтовканан атыу буйынса: 1-се урын – Зәлиә Юлановала (район мәғариф бүлеге) һәм Денис Погодинда («Дозор» ЯСЙ-һы), 2-се урын – Эльвина Итбаева (1-се һанлы Иҫәнғол мәктәбе) һәм Дмитрий Ерофеевта (2-се һанлы Иҫәнғол мәктәбе), 3-сө урын – Елена Алопина (2-се һанлы Иҫәнғол мәктәбе) һәм Андрей Гуринда – (райпо). Дөйөм очколар буйынса 2-се һанлы Иҫәнғол мәктәбе – 1-се, райпо – 2-се, район мәғариф бүлеге 3-сө урын алды.

Йөҙөү буйынса эстафета ярышыусыларҙы һәм тамашасыларҙы бассейнға йыйҙы. Сигнал бирелеү менән зәңгәр һыуға тәүгеләрҙән булып һикереп, үҙ командаһы өсөн мәрәй йыйырға тырышты йөҙөүселәр. Ундағы ярыш сәмен әйтеп, аңлатып та булмай, күрергә кәрәк ине. Һөҙөмтәләр еңеүсе командалар өсөн ҡыуаныслы: энергетиктар – 1-се, гимназия – 2-се һәм Иҫәнғол 1-се һанлы мәктәбе 3-сө урынға лайыҡ булды

Туп менән йүгереүҙә (эстафета) – иң ҡыҙығы ауыр тупты үҙеңдән алда һикертеп барыу. Тупҡа ныҡ һуҡһаң – бик алыҫҡа тәгәрәй йәки ипләберәк һуҡһаң – иҙәндә тәгәрләп бара, ярышыусы уның артынан ҡыуа төшә. Бик етеҙҙәр был уйында алдынғылыҡты бирмәне. Шуға ярашлы мәрәйҙәр ҙә яҙылды: Иҫәнғолдоң 2-се мәктәбе, Ф. Солтанов исемендәге мәктәп, Иҫәнғолдоң 1-се мәктәбе тәүге өс урынды алды.

Шашка турнирында шәхси беренселеккә уйнап, еңделәр:

1-се урын – Зәбир Хоҙабәндин (район мәҙәниәт бүлеге), 2-се урын – Илфат Аҫылбаев (район хакимиәте), 3-сө урын – Радик Абдуллин (3-сө һанлы Иҫәнғол мәктәбе).

Арҡан тартышыу иң тамашалы, иң көсөргәнешле, иң ҡыҙыҡ һәм оҙаҡ барған уйындарҙың береһе булды. ФСК стеналары был тиклем тауышты ҡасан ишеткәнен дә онотҡандыр. Һәр кем үҙ командаһы өсөн янып-көйөп, тамағы ҡарлыҡҡансы дәртләндереп торҙо. Ярышыусы командаларҙың еңеү өсөн ынтылышы уғата көслө булды. Һөҙөмтә түбәндәгесә: 1-се урынды – КЭС, 2-се урынды – гимназия, 3-сө урынды Иҫәнғол 2-се һанлы мәктәбе алды.

Гер күтәреү. Был спорт төрөн яратыусылар өсөн физик әҙерлек, мускулдар ныҡлығы, таһыллыҡ талап ителә. Спартакиадала ошо сифаттарға тулыһынса эйә булған, үҫеп килеүсе йәш быуынға һәр саҡ ярыштарҙа шәхсән өлгө күрһәткән, 10 минут эсендә 16 кг-лы герҙе 245 тапҡыр күрһәтеп рекорд ҡуйған кеше булды, ул лайыҡлы рәүештә 1-се урын яулаған Илдар Аҙнағолов (район мәғариф бүлеге). 2-се урын Нәжип Юлдашбаевҡа («Дозор» ЯСЙ-һы) һәм 3-сө урын Венер Байгилдинға (3-сө һанлы Иҫәнғол мәктәбе) бирелде.

Дөйөм күрһәткескә килгәндә, командалар араһында 1-се урын «Дозор» ЯСЙ-һында, 2-се урын – КЭС-та, 3-сө урынға район хакимиәте командаһы сыҡты.

Спорт байрамы тамам. Еңеүселәр кубоктар, грамоталар менән бүләкләнде. Дөйөм алғанда, спорт уйындарына йәлеп ителгән һәр кеше дәрт алып, илһамланып, күмәк уйында артабан да ҡатнашыу теләге менән янып таралышты.

Автор фотолары.