Һәр кем үҙ юлын үтә

“Ә, теге һәр саҡ көлөп торған апаймы, һылыумы“, тип таныйҙар мине”, – ти Зилә Хәйруллина “Уҡытыусыбыҙҙан уңдыҡ. Улыбыҙҙы Зилә Урал ҡыҙы уҡытыуын белгәс, эй ҡыуандыҡ. Бәләкәй сағында башҡортса һүҙҙәрҙе лә әйттерә алмаһаҡ, хәҙер улым мәктәптән ҡайта ла: “Әсәй, әйҙә башҡортса ғына һөйләшәйек!” – тип үтенә. Яңылыш русса һүҙҙәр ҡыҫтырһам, төҙәтеп ҡуя. Йә булмаһа, “был һүҙ башҡортса нисек була?” – тип ҡыҙыҡһына...” – Ф. Солтанов исемендәге мәктәптең 6-сы класында белем алған Арсландың әсәһе шулай һөйләп торғайны. Бына ошо уҡытыусы, “Йырау” ансамбленең алмаштырғыһыҙ ағзаһы Зилә Хәйруллина менән әңгәмә тәҡдим итәбеҙ.