-4 °С
Болотло
Бөтә яңылыҡтар
Телгенәм – бергенәм
14 Февраль 2021, 15:30
ЯБАЛАҠЛАП ҠАРҘАР ЯУА... (нәҫер)
"Мөхәббәтегеҙҙең ҡәҙерен белегеҙ, ялған һүҙҙәр арағыҙға кермәһен, ҡаршылыҡтар урап үтһен һеҙҙе, ғашиҡтар!" - тип өндәшкем килә уларға. Изге теләктәремде күҙҙәремдән уҡып бәхетле пар эргәмдән уҙып китә...Ябалаҡлап ҡарҙар яуа... Әллә ҡар, әллә бәхет?!
Ябалаҡлап яуған ынйылай аҡ ҡар бөртөктәрен тәҙрә аша бер аҙ күҙәтеп торғандан һуң, ошо гүзәл мәлдә яңғыҙ булыуыма бер аҙ моңайып, еңелсә кейенеп тышҡа сығам. Бер-береһен ҡыуышып яуған шаян ҡар бөртөктәре тыныс ҡына ергә төшөп ята...
Киң урам буйлап атлайым. Аяҡ аҫтында шығырлаған ҡар күңелгә кинәнес бирә, урамдың һил булыуы еңеллек өҫтәй.
Тирә-йүн - ап-аҡ. Әйтерһең, берәйһе тотҡан да тормошто үҙгәртеп ҡуйған: бар донъя тик аҡлыҡтан, яҡшылыҡтан торғандай. Ләкин был мөмкин түгел! Ер йөҙөндә тормош барлыҡҡа үк аҡ һәм ҡара, бәхет менән ҡайғы йәнәш йөрөйҙәр...
Ябалаҡлап ҡар яуа... Ер өҫтөндәге бысраҡлыҡтар бер миҙгелгә булһа ла юғалып тора. Ә бына кешеләр араһындағы аламалыҡтар иһә юғалмай. Нахаҡ һүҙҙәр, йән яралары әленән-әле иҫкә төшөп, йөрәк әрнеп һулҡып ҡуя...
Электр уты яҡтыһында төрлө төҫтәргә мансылып бишектәгеләй бәүелә-бәүелә ябалаҡлап яуған ҡар бөртөктәре аҫтында, бер-береһенә һыйынып үткән ғашиҡтарға һоҡланып ҡарап ҡуям. Ҡар бөртөктәре түгел, ә бәхет яуа кеүек уларҙың иңдәренә...
"Мөхәббәтегеҙҙең ҡәҙерен белегеҙ, ялған һүҙҙәр арағыҙға кермәһен, ҡаршылыҡтар урап үтһен һеҙҙе, ғашиҡтар!" - тип өндәшкем килә уларға. Изге теләктәремде күҙҙәремдән уҡып бәхетле пар эргәмдән уҙып китә...
Ябалаҡлап ҡарҙар яуа... Әллә ҡар, әллә бәхет?!
Читайте нас:
© "Ейәнсура таңдары" сайты, 2020-2024
Гәзит Элемтә, мәғлүмәт технологиялары һәм киң коммуникациялар өлкәһендә күҙәтеү буйынса федераль хеҙмәттең Башҡортостан Республикаһы буйынса идаралығында теркәлде. ПИ ТУ02-01355-се һанлы теркәү тураһында таныҡлыҡ 2015 йылдың 10 июлендә бирелгән.
Баш мөхәррир: Ә.М. Әйүпова.