Ейәнсуралар Донецк һәм Луганск халҡына ярҙам күрһәтә

Һуңғы ваҡиғалар менән бәйле, Донецк һәм Луганск республикаларында йәшәүселәрҙең ауыр осор кисереүҙәрен барыбыҙ ҙа беләбеҙ. Күп ҡатын-ҡыҙҙар, балалар һәм өлкән йәштәгеләргә хәүеф янаған мәлдә беҙ ҙә ситтә ҡала алмайбыҙ. Башҡортостанда, шул иҫәптән беҙҙең районда ла ярҙам ойоштороу буйынса штаб үҙенең эшмәкәрлеген дауам итә.

“Берҙәм Рәсәй” партияһының урындағы бүлексәһе секретары Ринат Ғөбәйҙуллин әйтеүенсә, ярҙам итергә теләк белдереүселәр күп.

• Иҙелбәк ауылынан “Руссал” йәмғиәте етәксеһе Руслан Байбулатов ике тонна он һәм 200 литр көнбағыш майы, Иҫәнғол ауылынан Анатолий Михайлов – 36 литр бал, Нәзирә Кәримова – ярмалар, макарондар, сәй, кофе, һабындар, таҫтамалдар, Яңы Петровканан Виктор Черноколпаков күпләп памперстар, Венера Мостафина Инвалидтар йәмғиәте исеменән шулай уҡ кейем-һалым, ярма-макарондар, сәй-кофе, шәхси гигиена саралары алып килде. Мәрхәмәтлелек ярҙамдары өсөн барыһына ла ихлас рәхмәтемде еткерәм, – ти Ринат  Ғәйентдин улы.

Штабҡа шылтыратып, ниндәй әйберҙәр алып килергә мөмкин икәнлеген һорашыусылар күп икән. Ауыр хәлдә ҡалған туғандаш халыҡтарға ярҙам ҡулы һуҙырға теләгәндәрҙән яңы кейем-һалым, бигерәк тә балалар, сабыйҙар кейемдәре, боҙолмай торған аҙыҡ-түлек, гигиена кәрәк-яраҡтары ҡабул итәләр.  Битараф булмағандар район хакимиәтенә (Иҫәнғол ауылы, Совет урамы, 5), 114-се бүлмәгә сәғ. 09.00-18.00-гә тиклем мөрәжәғәт итә ала. Шулай уҡ менән 89378460286 телефоны буйынса бәйләнешкә инергә мөмкин.