Бөгөн - Ауыл хужалығы һәм эшкәртеүсе сәнәғәт хеҙмәткәрҙәре көнө

Хөрмәтле ауыл хеҙмәтсәндәре, Ейәнсура районының агросәнәғәт комплексы хеҙмәткәрҙәре һәм ветерандары! Һөнәри байрамығыҙ менән иң йылы ҡотлауҙарҙы ҡабул итегеҙ!

Ауыл хужалағы һәм эшкәртеүсе сәнәғәт – ил иҡтисадының бик тә әһәмиәтле тармаҡтары, ауылдарҙың үҫешенең һәм сәскә атыуының нигеҙе.

Донъяла ер эшкәртеүҙән һәм иген үҫтереүҙән дә маҡтаулыраҡ һөнәр юҡ. Ауыл хужалығы тармағы хеҙмәткәрҙәре үҙенсәлекле кешеләр –көслө рухлылар, егәрлеләр һәм намыҫлылар, тыуған ерҙең йөрәк тибешен тойоп, физик эштән ҡурҡмай, бөтә көсөн һәм күңелен биреп эшләйҙәр. Бөгөн дә, ҡатмарлы климат шарттарына һәм донъялағы көсөргәнешле эпидемиологик хәл-торошҡа ҡарамай, районыбыҙҙың агросәнәғәт комплексы белгестәре ең һыҙғанып эшләй, эшһөйәрлек һәм түҙемлек, һайлаған һөнәргә тоғролоҡ өлгөһө булып тора. Һеҙҙең һәр кемегеҙ үҙенең һүрелмәҫ энергияһы, оптимизмы, изгелеккә һәм ғәҙеллеккә ышанысы, тыуып үҫкән ер өсөн фиҙаҡәр хеҙмәт итеүе менән таң ҡалдыра.

Ҡәҙерле ауыл эшсәндәре, хөрмәтле тармаҡ ветерандары, еңел булмаған хеҙмәтегеҙ, тормош аҡылығыҙ, ауыл традицияларын һаҡлауығыҙ һәм ерҙә эшләүсе династияларҙы тергеҙеүегеҙ өсөн рәхмәт һеҙгә. Барығыҙға ла ныҡлы һаулыҡ тормошоғоҙҙа ыңғай үҙгәрештәр, тотороҡлолоҡ, ышаныслы киләсәк, ҡыйыу башланғыстарығыҙҙа уңыштар, изге һәм еңел булмаған эшегеҙҙә яңы ҡаҙаныштар һәм еңеүҙәр теләйем!

Д. Юланов, МР хакимиәте башлығы.