Иртәгәнән ковидҡа ҡаршы яңы тыйыуҙар үҙ көсөнә инә

12 октябрҙән был исемлеккә сауҙа үҙәктәре, шәхси музейҙар, күргәҙмә залдары, китапханалар, кинотеатрҙар, концерт залдары өҫтәлә; прививка тураһында сертификатһыҙ йәки сирҙе үткәреү тураһында белешмәһеҙ ҡала-ара автобустарға һәм «Орлан» ҡала яны поезына билет һатып алып булмай.

18 октябрҙән сикләү саралары матурлыҡ салондарына, СПА-салондарға, солярийҙарға, мунсаларға, сауналарға, физкультура-һауыҡтырыу комплекстарына, фитнес-клубтарға, бассейндарға, ресторан-кафеларға (әгәр унда 50-нән ашыу урын булһа) ҡағыла.

Башҡортостанда ауырыуҙарҙың дөйөм һаны 71 023-кә еткән. Стационарҙа 986 кеше дауалана, шул иҫәптән 60 йәште үткән 591 пациент. 50 кешенең хәле ауыр, 17-һе үпкәне яһалма елләтеү аппаратына тоташтырылған. 6 244 кеше амбулатор шарттарҙа дауалана (60 йәштән өлкән 4 143 кеше).

Коронавирустан бөтәһе 61 971 пациент һауыҡҡан, шул иҫәптән 604-е — һуңғы тәүлектә.

Әлеге ваҡытта республикала вафат булғандар һаны — 1822 кеше, 60 йәштән өлкәндәр — 1534.

Башҡортостанда вакцинация дауам итә. 1 891 848 кеше — вакцинаның беренсе, 1 325 308 кеше ике компонентын да алған.

Шулай уҡ дауахананан тыш пневмония статистикаһы ла алып барыла. Бер тәүлектә 239 осраҡ асыҡланған.