Көлөп алайыҡ

Ир менән ҡатынды туйға саҡырғандар. Ҡатын:

– Миңә яңы күлдәк, туфли, алтын сылбыр кәрәк буласаҡ, – тип теҙеп алып киткән.

– Ә миңә? – тип һораған ире.

– Һиңә ябығырға кәрәк, иҫке костюмыңа һыймай башланың бит.

* * *

Балыҡсы ике күнәк балыҡ тотоп йылға буйынан ҡайтып бара. Ҡаршыһына рыбнадзор инспекторы килеп сыға.

– Был тиклем балыҡ тоторға рөхсәт ҡағыҙың бармы? – тип һорай ул балыҡсынан.

– Мин уларҙы тотманым, мин был балыҡтарҙы аҫрайым.

– Нисек?

– Кемдер эт, бесәй, һыйыр тота, ә мин балыҡ аҫрайым. Иртәнсәк йылғаға ебәрәм дә кис барып саҡырһам, улар күнәгемә килеп тулалар. Төнгөлөккө аквариумға ебәрәм.

– Бушты һөйләп торма. Хәҙер һиңә протокол төҙөйбөҙ.

– Ышанмаһаң, әйҙә, күрһәтәм. Хәҙер балыҡтарҙы йылғаға ебәрәм дә кире йыйып алам.

– Әйҙә һуң.

Йылғаға барып, ир күнәктәрен һыуға түңкәргән. Бер аҙ ваҡыт үткән.

Инспектор:

– Йә саҡыр инде.

– Кемде?

– Кемде-кемде. Балыҡтарҙы инде!

– Һин нимә, иҫәрләндеңме әллә?! Ҡасан балыҡты саҡырғандарын күргәнең бар?

* * *

Ике дуҫ бер үк төрлө фатир һатып алғандар. Береһе икенсеһенән һорай:

– Ҡара әле, һин залыңа обой йәбештерҙең бит. Нисә рулон алдың?

– Һигеҙ.

Бер аҙнанан тағы осрашалар:

– Сәләм! Мин бына аңламайым, һинең кеүек үк һигеҙ обой алып, залға йәбештергәйнем икәү артып ҡалды.

– Шулай булырға тейеш тә, минеке лә икәү артып ҡалғайны.

* * *

– Әсәй, ни өсөн беҙҙең атай пеләш?

– Сөнки ул башлы.

– Әсәй, ә һинең сәстәрең ниңә шулай күп?

– Күп һөйләнмә, ашауыңды бел!