"Эх, быймаһы ла, быймаһы"

Быйма матур, быйма ҡупшы

Быйма һәр саҡ йылы.

Быйма кеүек ҡупшы килһен

Быйылғы Йылан йылы.

Беҙ кейәбеҙ быймалар

Быймалар ышаныслы.

Быйма булғанда һан юҡ

Итектәргә ҡуныслы.

Инде йолаға ингән сараға килеүселәр ике командаға бүленде. "Ҡар бөртөктәре" һәм "Алға" командалары "Быйма бәреү", "Быйма тапшыр", "Ҡулға быйма кейеп атлау", " Сәпкә-быйма", "Быйма аша һикереү", "Ат сабыштырыу", "Быйма менән оҫта бейеүсе" уйындарында көс һынашты. Көсөргәнешле ярышта "Ҡар бөртөктәре"  еңеүсе тип табылды.

Байрамда ниндәй генә быймалар юҡ ине: 40 йыл тарихы булған һәм ҡомартҡы, тишекле, төпләнгән йәки ямалған, ҡыҫҡа һәм оҙон ҡуныслы, сувенер быймалар бар ине.

Баһалама ағзалары оҙаҡ бәхәсләшкәндән һуң, номинациялар ошолай билдәләнде:

"Тарихлы быйма" - 40 йылдан ашыу тарихы булған быйма менән таныштырған Иҙрисова Гөлбаныу;

"Иң матур биҙәлгән быйма" - Мырҙабаева Асия, Кинйәбулатова Зөләйха;

"Иң ҙур быйма" - Мырҙабаева Минибикә;

"Иң бәләкәй быйма" - Каримова Айзилә;

"Быйма тураһында таҡмаҡ сығарыусы" - Мырҙабаева Асия;

"Быйма кейеп етеҙ бейеүселәр" - Мырҙабаева Асия һәм Мырҙабаева Минибикә.

Ҡатнашыусылар барыһы ла йырлап-бейеп, биҙәлгән быймаларын яҡлап, иҫтәлеккә бүләктәр алып таралышты. Байрам сараһы барыһының да күңеленә хуш килде.

Түбән остан берәү килә

Аяҡтарында быйма.

Беҙҙә ҡыштар һыуыҡ була

Быймаңды ташлап ҡуйма.

Сәүиә Ҡолмөхәмәтова, китапханасы.