"Ҡатын-ҡыҙҙың ҡырҡ сырағы"

"Айыҡ ауыл" бәйгеһе сиктәрендә Кинйәбулатта үткән сара бөйөк шағир Мостай Кәримдең ана шул һүҙҙәре менән асылды. "Ҡатын-ҡыҙҙың ҡырҡ сырағы" тип аталды ул. 

Күркәм сарала ҡуйылған күргәҙмәлә Кинйәбулат ҡыҙҙары-килендәренең оҫталығын күрергә, хатта уларҙан өйрәнергә мөмкин ине. Ә икенсе өлөшөндә ойошторолған түңәрәк өҫтәл артында һөйләшеү бик фәһемле булды. Әңгәмәгә район хакимиәте башлығы урынбаҫары Гөлнара Йәрмөхәмәтова, уңышлы эшләгән эшҡыуар Юлиә Йөҙөкәева, ҡатындар сәләмәтлеге һағында торған табип Гөлфирә Исмәғилева, блогер Зөлфиә Фәхретдинова, район башлығының ҡатыны Резеда Юланова, улы махсус хәрби операцияла ҡатнашҡан Гөлкәй Хоҙабәндина, оҙаҡ йылдар бергә йәшәгән бейем-килен Кинйәбулатовалар, ағинәй Люциә Кинйәбулатова саҡырылғайны. Был көндә районда эш сәфәре менән булған Бөтә донъя башҡорттары ҡоролтайы башҡарма комитеты ағзаһы Гөлназ Ҡолһаринаның да сараға ҡушылыуы уның мәртәбәһен арттырҙы. 

Ҡатын-ҡыҙҙар бөгөн көнүҙәк булған мәсьәләләре күтәрҙе, уларҙы хәл итеү юлдарын эҙләне. Килен-бейем мөнәсәбәтенә лә, тәрбиә темаһына лә  туҡталды. Ҡатын-ҡыҙ сәләмәтлегенә ҡарата бик матур кәңәштәрен бирелде. Ҡыҫҡаһы, аулаҡҡа йыйылып, сер бүлештеләр. 

Торараҡ әңгәмәгә районы хакимиәте башлығы Дәмин Юланов, Рәсәй Федерацияһы Дәүләт Думаһы депутаты Зариф Байгусҡаров, Һүрәм биләмәһе башлығы Азамат Батыршин ҡушылды. Гүзәл заттың етәксе, ғаилә башлығы, атай булараҡ уларға ла һорауҙары бар ине.

Сара бик йылы мөхиттә, ихлас үтте. Ҡатнашыусылар барыһы ла бындай осрашыуҙар һәр биләмәлә ойошторолорға тейеш, тигән фекерҙә таралды.