“Бөгөн беҙҙең игенселәр тәүге миллион тонна ашлыҡ йыйып алды. Бөтә баҫыуҙарҙың биштән бер өлөшөнән дә әҙерәге генә урып йыйылды әле”, – тип яҙҙы социаль селтәрҙә Башҡортостан Башлығы Радий Хәбиров.
Республика етәксеһе белдереүенсә, быйыл уңыш, йыл да күп иген йыйып алынған территорияларҙа ғына түгел, Урал аръяғында ла, төньяҡ урман-дала зонаһында ла мул.
“Хәҙер беҙҙең өсөн иң мөһиме – был байлыҡты йыйып алыу. Бының өсөн һауа торошо уңайлы, хәйер үҙенсәлектәре бар. Көндөҙгө һәм төнгө температура айырмаһы ҙур булғанлыҡтан, мул ысыҡ төшә, ул беҙҙең игенселәргә баҫыуҙарға иртә менән сығырға бирмәй”, – тип яҙҙы ул.
Урып йыйыуҙа Стәрлетамаҡ районы алда бара, унда 100 мең тоннанан артыҡ урып йыйылған, Илеш районында 70 мең тонна тирәһе. Стәрлетамаҡ хужалыҡтары шулай уҡ иң яҡшы уңыш ала – һәр гектарҙан 47 центнерҙан күберәк.