Сибайҙа филармония асыла

Бында Сибай филармонияһы ҡабат асыла!

“Сибай филармонияһындағы янғындан һуң бында яңынан концерттар тыңлап булыуына бик аҙҙар ышана ине. 2015 йылдың көҙөндә ут бинаның бик ҙур өлөшөн юҡҡа сығарҙы, өс стенаһы ғына тороп ҡалды, – тип яҙҙы республика етәксеһе. – Филармонияны бындай хәлдә ҡалдыра алманыҡ, шуға күрә 2019 йылда ҙур реконструкция башланыҡ. Эштәрҙе Сибайҙың 65 йыллығына тамамларға уйлағайныҡ, тик коронавирус ҡамасауланы.

Янғындан һуң бинаны тулыһынса тиерлек яңынан төҙөнөк, тамашалар залын 500 урынға тиклем ҙурайттыҡ, бәләкәй зал өсөн урын бүлдек. Иң мөһиме – филармонияның үҙенсәлекле архитектур йөҙөн һаҡлай алдыҡ. Шулай уҡ яңы корпус төҙөнөк, биләмәһен төҙөкләндерҙек, инженер системаһын уйланыҡ.

Сибай филармонияһының яңыртылған концерт залы оҙаҡламай, сентябрҙә асыласаҡ. Ысын тауыш һәм заманса майҙан. Әминә Шафиҡова, Рөстәм Афзалов, концерт датаһын билдәләгеҙ (барлыҡ эпидемиологик сараларҙы үтәп) һәм ҡунаҡтар саҡырығыҙ”.

Фото: Радий Хәбировтың социаль селтәрҙәге сәхифәһенән.