Бөйөк Ватан һуғышына беҙҙең райондан саҡырылған алты яугир – Ҡотләхмәт Хәйбуллин, Ҡәйүм Әхмәтшин, Николай Бедренко, Григорий Филатов, Алексей Рутчин, Иван Корнеев күрһәткән батырлыҡтары өсөн Советтар Союзы Геройы исеменә лайыҡ булған. Яҡташтарҙың ҡаһарманлығы онотолмай. “Дуҫлыҡ” паркында улар хөрмәтенә Дан аллеяһы булдырылып, алты батырҙың да бюстары ҡуйылды.
Ватан геройҙары көнөндә тантаналы митингтар Чекмарев исемендәге парктағы Бөйөк Ватан һуғышында ҡатнашыусылар иҫтәлегенә ҡуйылған мәңгелек ут янында һәм “Дуҫлыҡ” паркындағы Дан аллеяһында үтте. Район Советы секретары Марат Мөхәмәтов сараға килгәндәрҙе был көндөң барлыҡҡа килеү тарихы менән таныштырҙы. Район ветерандар советы рәйесе Нәзирә Кәримова, район хакимиәтенең Йәштәр, спорт һәм бәлиғ булмағандар эштәре буйынса бүлек начальнигы Фидан Түләбаев, “Бөркөт” хәрби хәрәкәттәр ветерандары ойошмаһы вәкилдәре, 2-се һәм Ф. Солтанов исемендәге мәктәптәр уҡыусылары һәм уҡытыусылары ҡатнашлығында үткән был сара батырҙар бюстарына һәм мәңгелек утҡа сәскәләр һалыу менән тамамланды.