Хеҙмәт ветерандарына ниндәй льготалар тейеш һәм был исемде нисек алырға

“Хеҙмәт ветераны” исеме нисә йәш булыуына бәйһеҙ рәүештә билдәле бер стаж, ҡаҙаныштар һәм наградалар өсөн бирелә. Был исем өсөн льготалар төрлө төбәктә төрлөсә.

Ғәҙәттә улар иҫәбенә түбәндәгеләр инә:

– ай һайын түләмдәр;

– коммуналь хеҙмәттәргә түләмдәрҙең яртыһын компенсациялау;

– ҡала яны транспортында бушлай йөрөү;

–  протез-ортопедик һәм медицина ярҙамы.

“Хеҙмәт ветераны”н алыу өсөн СССР йәки РФ ордендары, миҙалдары, почетлы исемдәре, РФ Президентының почет грамоталары йәки рәхмәт хаты, ведомство наградалары кәрәк. Стаж:

– ирҙәр өсөн кәмендә 25 һәм ҡатын-ҡыҙҙар өсөн 20 йыл;

– награда алынған эшмәкәрлек өлкәһе йәки иҡтисад тармағы өсөн дөйөм стаждан кәмендә 15 йыл стаж йәки выслуга;

– дәүләт хеҙмәткәрҙәре өсөн – пенсияға кәрәкле выслуга йылдары.

Әгәр наградалар булмаһа, әммә һеҙ 18 йәшегеҙ тулмағана Бөйөк Ватан һуғышы йылдарында эшләһәгеҙ, ирҙәр өсөн кәрәкле стаж – 40 йыл, ҡатын-ҡыҙҙарға – 35 йыл.