Аштары тәмле, йөҙө көләс

Аҙаҡҡы йылдарҙа балаларҙы туҡландырыуға ҙур иғтибар бүленә. Уҡыусларҙың рационы тулы, файҙалы, шул уҡ ваҡытта тәмле лә булырға тейеш. Иҫәнғолдоң 2-се мәктәбенең ашнаҡсылары үҙҙәренә ҡуйылған бөтә талаптарҙы теүәл үтәп, мәктәп уҡыусыларын тәмле аштар менән һыйлай. Вилә Ейәнбирҙина етәкселегендәге ашхана хеҙмәткәрҙәре көн дә 700-ләп баланы ҡайнар аш менән тәьмин итә.

Вилә Ғаяз ҡыҙы был һөнәргә осраҡлы килгән. Тәүге һөнәре буйынса башланғыс кластар уҡытыусыһы булып эшләргә тура килмәй. Район үҙәгендә эш булмай, ә алыҫтағы ауылға барырға теләге булмай. Ул шулай хеҙмәт юлын Венера Исхаҡованың кондитер цехында һауыт-һаба йыуыусы булып башлай. Бер ай эшләгәс уны ла ләүәш, сәк-сәктәр бешерергә өйрәтәләр. Тап ошонда Виләнең бешереүгә оҫталығы асыла ла инде. Бер аҙ тәжрибә туплағас, 2011 йылда ашнаҡсылар курсын тамамлап, 2-се мәктәпкә эшкә күсә. Әммә Вилә Ғаяз ҡыҙын күптәр сәк-сәк оҫтаһы итеп белә. Төп эшенән тыш ул байрам табындарына зауыҡ менән матур итеп биҙәлгән сәк-сәктәр, төрлө эслекле ләүәштәр бешерә. Күңелен биреп эшләгәс, ризыҡтары йәмле лә, телеңде йоторлоҡ тәмле лә килеп сыға. Әйткәндәй, хәҙер инде Азалия һәм Разалия исемле игеҙәк ҡыҙҙары ла ҡул аҫтына ингән. Сәк-сәк ҡамырын ҡырҡышалар, бергәләп тәмле торттар бешерәләр.

Быйыл һәр ерҙә лә  өлгөр ашнаҡсы «Иң яҡшы мәктәп ашнаҡсыһы» район конкурсында 2-се урын яулаған. Вилә Ғаяз ҡыҙы шулай уҡ бәйгенең республика этабында «Кулинар баттл» номинацияһында 3-сө урын яулаған.