Өләсәһен үлтергән Ейәнсура кешеһе суд алдына баҫасаҡ

Башҡортостан прокурорының беренсе урынбаҫары Ейәнсура районында йәшәүсегә ҡарата енәйәт эше буйынса ғәйепләү һығымтаһын раҫланы. Республика прокуратураһының матбуғат хеҙмәтенән хәбәр итеүҙәренсә, ул ярҙамһыҙ ҡатынды үлтереүҙә ғәйепләнә.

Былтыр июлдә күҙҙәре күрмәгән 86 йәшлек өләсәһе менән конфликт ваҡытында иҫерек ир, уны туҡмай һәм быуып үлтерә. Енәйәт эҙҙәрен йәшереү өсөн ғәйепләнеүсе мәйетте туңдырыу камераһына һала һәм ваҡиға урынын ташлап ҡаса. Өс айҙан ашыу оло йәштәге ҡатын хәбәрһеҙ юғалған, тип иҫәпләнә.

Ирҙе өфөлә 2023 йылдың октябрендә полиция хеҙмәткәрҙәре тапҡан. Ғәйепләнеүсе үҙ ғәйебен таный. Быға тиклем ул бер нисә тапҡыр хөкөм ителгән.

Енәйәт эше ҡарау өсөн Башҡортостандың юғары судына йүнәлтелгән.

Фото:Кугарчинский межрайонный суд, Vk