Башҡортостанда йәшәүселәр августа арттырылған пенсия аласаҡ

1 августан Рәсәй Социаль фондының Башҡортостан буйынса бүлексәһе 2024 йылда эшләүсе пенсионерҙар өсөн страховка пенсияларын автоматик рәүештә ҡайтанан иҫәпләйәсәк. Үткән йылда эш биреүселәр улар өсөн страховка иғәнәләрен түләгән ҡартлыҡ һәм инвалидлыҡ буйынса страховка пенсияһын алыусыларҙың барыһына ла түләүҙәр артасаҡ.

Ведомствола билдәләүҙәренсә, пенсияға август өҫтәмәһенең күләме пенсионерҙың эш хаҡы кимәленә бәйле: эш хаҡы юғары булған һайын, түләү ҙә күберәк арта. Максималь мөмкин булған өҫтәмә өс пенсия коэффициенты.

Тупланған коэффициенттар тураһында мәғлүмәтте дәүләт хеҙмәттәре порталында шәхси кабинет аша һорап алырға мөмкин булған шәхси иҫәптәге выпискала табырға мөмкин.

"Август айында иҫәп-хисап автоматик рәүештә башҡарыла, шуға күрә пенсионерҙарға бер ҡайҙа ла мөрәжәғәт итергә кәрәкмәй. Пенсиялар билдәләнгән графикка ярашлы августа түләнәсәк», — тип асыҡлыҡ индерҙеләр Рәсәй социаль фондының республика бүлексәһе матбуғат хеҙмәтендә.