Башҡортостанда уртаса эш хаҡы билдәле булды

Башстат мәғлүмәттәре буйынса, Башҡортостанда 2026 йылдың ғинуарында уртаса айлыҡ номиналь иҫәпләнгән эш хаҡы 74 275 һум самаһы тәшкил иткән. Был 2025 йылдың ғинуарына ҡарағанда 10,9 процентҡа күберәк. Шул уҡ ваҡытта республикала реаль иҫәпләнгән эш хаҡы бер йылда 4,4 процентҡа артҡан.

Эшләүселәрҙең уртаса айлыҡ номиналь иҫәпләнгән эш хаҡы хеҙмәткәрҙәрҙең эш хаҡы фондынан сығып билдәләнә, ул эшләүселәрҙең уртаса исемлек һанына һәм осорҙағы айҙар һанына бүленә.

Иҫәпләнгән эш хаҡы хеҙмәткәрҙән һалымдарҙы һәм тотоуҙарҙы үҙ эсенә ала. Дәүләт һәм дәүләткә ҡарамаған бюджеттан тыш фондтарҙан эшселәр алған социаль пособиелар эш хаҡы һәм уртаса айлыҡ эш хаҡы фондына индерелмәй.