Һеҙ – район тауышы

Хөрмәтле киң мәғлүмәт саралары хеҙмәткәрҙәре һәм матбуғат ветерандары! Һеҙҙе һөнәри байрамығыҙ – Башҡортостан Республикаһының Матбуғат һәм мәғлүмәт хеҙмәткәрҙәре көнө менән ысын күңелдән ҡотлайым!

Һеҙҙең эшегеҙ – халыҡҡа ваҡиғалар тураһында мәғлүмәт биреү генә түгел, ә йәмәғәтселек фекерен формалаштырырға, быуындар бәйләнешен һаҡларға һәм районыбыҙ үҫешенең иң мөһим, көнүҙәк мәсьәләләрен күтәрергә ярҙам итеүсе көндәлек хеҙмәт. Һеҙҙең профессионаллегегеҙ, битараф булмауығыҙ һәм хәҡиҡәткә ынтылышығыҙ һөҙөмтәһендә кешеләр һәр ваҡыт төп яңылыҡтар тураһында хәбәрҙар, һеҙгә ышана һәм белә: һеҙ – район тауышы.

Һәр яҡлап ярҙам күрһәтеүегеҙ, һәр сарала – байрам, өмә йәки мөһим йәмәғәт акцияһы булһынмы, әүҙемлек күрһәтеүегеҙ өсөн айырым рәхмәт һүҙҙәрен белдерергә теләйем. Һеҙҙең дәрт, ижади ҡомар һәм сикһеҙ яңы идеялар район тормошон сағыуыраҡ, һәр ваҡиғаны ысын мәғәнәһендә әһәмиәтле итә.

Геройҙарыбыҙҙы мәңгеләштереү буйынса хеҙмәтегеҙ оло ихтирамға лайыҡ. Ейәнсура районынан МХО зонаһында бурысын үтәгән яугирҙәр тураһындағы ике китап баҫтырыуығыҙ өсөн рәхмәт. Был китаптар – йөрәк менән яҙылған тере тарих. Улар киләсәк быуындар өсөн яҡташтарыбыҙҙың исемдәрен, батырлыҡтарын һәм йөҙҙәрен һаҡлап ҡаласаҡ, ғаиләләр өсөн иҫтәлек һәм йәштәр өсөн батырлыҡ өлгөһө буласаҡ.

Ҡәҙерле журналистар һәм матбуғат ветерандары! Һеҙгә ныҡлы һаулыҡ, бөтмәҫ-төкәнмәҫ илһам һәм сағыу, изге проекттар теләйем. Һеҙҙең коллективтарҙа һәр ваҡыт үҙ-ара аңлашыу һәм ижади күтәрелеш атмосфераһы хакимлыҡ итһен, һәр яңы көн тик һөйөнөслө хәбәрҙәр генә килтерһен. Бәхет, тыныслыҡ һәм именлек һеҙгә! Байрам менән!

Д. ЮЛАНОВ, МР хакимиәте башлығы.