«Хеҙмәт ветераны» исемен биреү тәртибе ябайлаштырыла

Рәсәйҙең Хеҙмәт министрлығы «Хеҙмәт ветераны» һәм «РФ субъектының Хеҙмәт ветераны» исемдәрен биреү процедураһын ябайлаштырыусы төҙәтмәләр әҙерләне.

Әлеге ваҡытта закон проекты йәмәғәт фекер алышыуы өсөн норматив хоҡуҡи акттар порталында урынлаштырылған.

Әле ғәмәлдә булған тәртипкә ярашлы граждандар ғариза биргәндә наградалар булыуын раҫлаған документтарҙы үҙаллы йыйырға һәм тапшырырға тейеш. Ведомствоның башланғысы наградалар тураһында мәғлүмәттәрҙе хеҙмәт стажы тураһында мәғлүмәт булған «Берҙәм һанлы платформа» системаһына күсереүҙе күҙ уңында тота.

Процессты автоматлаштырыу профилле ведомстволарға бөтә кәрәкле мәғлүмәттәрҙе ғариза биреүселәр ҡатнашлығынан тыш тикшерергә мөмкинлек бирәсәк, был граждандарҙы раҫлаусы документтар тапшырыуҙан тулыһынса арындырасаҡ.