Мәктәп ашханаларында порциялар күпме булырға тейеш?

Роспотребнадзорҙың республика буйынса идаралығының тышҡы коммуникациялар бүлеге начальнигы Регина Аҡмалова Республикаға идара итеү үҙәгенән Башҡортостан юлдаш телеканалының тура эфирында мәктәп ашханаларында порциялар нормаһы тураһында иҫкә төшөрҙө, тип яҙа “Башинформ”.

Улар баланың йәшенә ҡарап иҫәпләнә. Әйтәйек, 7-12 йәшлек баланың иртәнге ашы - 500 (төшкө аш - 700), 12 йәштән өлкәнерәктәрҙең 550 грамм (төшкө аш - 800) булырға тейеш. 7-12 йәшлек балалар өсөн тәүлеклек энергетик ҡиммәт - 2350 ккал, 12 йәштәгеләр һәм унан өлкәнерәктәр өсөн - 2720 ккал.

Быға тиклем яңы уҡыу йылында уҡыусылар өсөн ике яңы меню әҙерләүҙәре тураһында хәбәр ителгәйне. Унда дөрөҫ туҡланыу принциптары, нутрициологтар һәм диетологтарҙың кәңәштәре иҫәпкә алынған. Уҡыусыларға алма чипсылары, томат соусындағы фрикаделькалар, һыйыр итенән купаттар, балыҡ фишболдары тәҡдим ителәсәк.

Фото: Олег Яровиков / «Башинформ»