"Бураҡаева уҡыуҙары"

Был, республикала беренсе тапҡыр этнопедагогика буйынса үткәрелгән төбәк-ара фәнни-ғәмәли конференция ике көн дауамында барҙы. Ул “Тормош һабаҡтары” программаһы һәм дәреслектәренең авторы, “Йәйләү” профилле сменаһының, “Башҡортостан ынйылары”, “Урал батыр мәктәбе” проекттарының авторы, яҙыусы, Салауат Юлаев ордены кавалеры, гимназияға нигеҙ һалыусы, ил инәһе Мәрйәм Бураҡаеваға 80 йәш тулыуға арналды.

Республикала илһөйәрлек тәрбиәләүҙә һәм туған телде, мәҙәниәтте һаҡлауҙа мөһим роль уйнаған этнопедагогика буйынса беренсе күләмле конференция - гимназия-мәктәп уҡытыусыларын һәм директорҙарын ғына түгел, шулай уҡ Өфө, Стәрлетамаҡ, Бөрө, Сибай юғары уҡыу йорттары ғалимдарын да йыйҙы. Республиканың 19 районынан һәм ҡалаһынан, шулай уҡ Силәбе, Ырымбур өлкәләренән 100-ҙән ашыу ҡатнашыусыны ҡабул итте. Конференция сиктәрендә гимназияла асыҡ дәрестәр, оҫталыҡ дәрестәре күрһәтелде, күргәҙмәләр ойошторолдо,  этнопедагогика музейы асылды.