Дәүләт ярҙамы дәрт бирә

Башҡортостанда 2023 йылда, “Агростартап” грантына 24 кеше лайыҡ булды.  Был дәүләт ярҙамына республикала былтыр 149 млн һум аҡса йүнәлтелгән. 

 Ҡужабаҡ ауылында йәшәүсе Динара һәм Варис Туҡаевтар ҙа  2019 йылда дәүләт ярҙамын юллап ҡарарға булғандар. Барыһы ла ыңғай ғына килеп сыға, мәғлүмәт үҙәге белгестәре менән кәңәшләшкәндән һуң, документтар ҙа тиҙ генә туплана. Туҡаевтар Ауыл хужалығы министрлығында үҙҙәренең проектын яҡлап сыға алалар һәм “Агростартап” йүнәлешендә грант алыуға өлгәшкәндәр. Йәш ғаилә өсөн дәүләт ярҙамы ярап ҡала. Туҡаевтар был аҡсаға МТЗ-82 тракторы һәм ҡара-ала һөтлө һыйырҙар һатып алғандар.

-Беҙгә йәш ғаиләгә һәм үҙ эшен башлаусыларға ярҙам ҡулы һуҙған район хакимиәтенә, мәғлүмәт үҙәге белгестәренә бик рәхмәтлебеҙ. Грант беҙҙең өсөн бик яҡшы ярҙам булды, ең һыҙғанып эшләргә этәргес көс бирҙе, дәртләндереп ебәрҙе, ­– ти Динара Ҡылысбай ҡыҙы.

Әле Туҡаевтар хужалыҡтарын аталары Ҡылысбай Маҡаев менән бергә алып бара. Уларҙың дөйөм хужалығында 193 баш мал иҫәпләнә. Шуларҙың 109-ҙы – һауын һыйырҙары. Уңған хужалар көндәлек һауымды һөт эшкәртеү заводтарын оҙатып тора.

Тәслимә Ҡыуатова, “Минең бизнес” үҙәге етәксеһе:

-Һәр төрлө гранттар, субсидиялар йүнселдәр өсөн бик яҡшы ярҙам булып тора. Иң мөһиме – дәүләт ярҙамын ваҡытында үҙләштереү, кәрәкле техника йәки мал һатып алыуға йүнәлтеү. Сөнки хаҡтар бик тиҙ арта, заман менән бергә атларға кәрәк.

“Күп нимәләрҙе алдан күҙалларға мөмкин булмаған турбулент ваҡытта йәшәйбеҙ. Әммә ауыл хужалығын күтәреү эштең приоритет йүнәлештәренең береһе булып тора, ­– тине Башҡортостан Башлығы Радий Хәбиров үҙ сығышында. ­– Ғөмүмән, Башҡортостанда ҙур потенциал бар, ул – ер, хеҙмәт ресурстары, ҙур, көслө уйынсылар менән килгән компетенциялар. Ә һөт – ул стратегик продукт, һәм беҙ һөт етештереүҙә яҡшы ғына күрһәткестәргә ирешкәнбеҙ. Иң мөһиме әүҙемлекте юғалтмаҫҡа, алға барыуҙы дауам итергә.”