Килешеү төҙөргә кәрәк

Башҡортостандың күп фатирлы, шәхси йортта йәшәүсе, шулай уҡ юридик һәм физик берәмектәр 2019 йылдың 1 ғинуарынан сүп-сар сығарыу буйынса хеҙмәтләндереү буйынса төбәк операторы менән килешеү төҙөргә тейеш. Был хаҡта Башҡортостандың Тәбиғәт менән файҙаланыу һәм экология министрлығы хәбәр итә.

Бындай килешеү төҙөү кәрәклеге Рәсәй Федерацияһы Хөкүмәте тарафынан раҫланған ҡаты коммуналь ҡалдыҡ менән эш итеү ҡағиҙәләрендә күрһәтелгән. Әле килешеү төҙөү формаһы һәм тәртибе төбәк операторының рәсми сайтында ҡуйылған.

“Эко-Сити” төбәк операторы ЯСЙ-һы (тел. 8(800)700-49-00, http://ecocityrb.ru/), Күмертау, Салауат, Сибай, Стәрлетамаҡ ҡалалары, Әбйәлил, Ауырғазы, Баймаҡ, Белорет, Бөрйән, Ғафури, Ейәнсура, Стәрлебаш, Йылайыр, Ишембай, Күгәрсен, Көйөргәҙе, Мәләүез, Миәкә, Стәрлетамаҡ, Учалы, Федоровка һәм Хәйбулла райондарын хеҙмәтләндерә.

Сүп-сарҙы йыйыу һәм сығарыуҙың яңы системаһына күсеүгә бәйле барлыҡ һорауҙар менән төбәк операторының һәм Башҡортостандың Тәбиғәт менән файҙаланыу һәм экология министрлығының “ҡайнар элемтә”һенә 8 (347) 218-03-90 шылтыратырға мөмкин.

Иҫегеҙгә төшөрәбеҙ, 2019 йылдың 1 ғинуарынан беҙҙең республика, бөтә ил кеүек үк, ҡаты коммуналь ҡалдыҡтар менән эш итеүҙең яңы системаһына күсте. Хәҙер сүп-сарҙы йыйыу, сығарыу, эшкәртеү, утилләштереү, зарарһыҙландырыу һәм күмеү буйынса төбәк операторҙары шөғөлләнә, ә халыҡ был хеҙмәт өсөн раҫланған тарифтарға ярашлы түләй.

Был эш, тәү сиратта, сүп-сар менән заманса, экологик яҡтан хәүефһеҙ эш итеүгә, рөхсәтһеҙ сүплектәрҙе юҡҡа сығарыу, яңыларын барлыҡҡа килтермәү өсөн, шулай уҡ сүп-сарҙы эшкәртеү буйынса үҫешкән инфраструктура булдырыуға йүнәлтелгән.

Ә. Әйүпова әҙерләне.