Башҡортостандан - дүртәү

Дөйөм алғанда бәйгенең “Һаулыҡ һаҡлау” тармағында ярымфиналға илдең 54 төбәгенән 237 кеше сыҡҡайны. Кисә улар илдең Һаулыҡ һаҡлау министры Михаил Мурашко менән осрашты. Ул һаулыҡ һаҡлау системаһын һанлаштырыу, табип һөнәрен популярлаштырыу һәм башҡа мөһим мәсьәләләр тураһында һөйләгән.

Артабан бәйгелә ҡатнашыусылар өсөн “Һаулыҡ һаҡлау” милли проектын тормошҡа ашырыу буйынса ҙур стратегик сессия ойошторолдо. Был теманы профессор, медицина фәндәре докторы Леонид Рошаль тәҡдим иткән. Шулай уҡ улар һаулыҡ һаҡлау министры урынбаҫары, 2017-2018 йылдарҙа “Рәсәй лидерҙары” бәйгеһендә еңгән Олег Салагай, Федераль медик-биологик агентлыҡ етәксеһе Вероника Скворцова менән дә осрашып фекер алышҡан. Ярымфиналсылар өсөн бик күп саралар ойошторолған. Улар дискуссияларҙа, эшлекле уйындарҙа, оҫталыҡ дәрестәрендә ҡатнашты, көнүҙәк мәсьәләләрҙе тикшерҙе.

“Рәсәй лидерҙары” конкурсы етәксеһе Алексей Комиссаров белдереүенсә, ғөмүмән, конкурстың “Һаулыҡ һаҡлау” специализацияһына 9745 медицина хеҙмәткәренән ғариза ебәрелгән. Улар эшләп йөрөгән табиптар һәм һаулыҡ һаҡлауҙы ойоштороусылар.

“Ярымфиналда ҡатнашыусыларҙың өстән бер өлөшө йә медицина фәндәре докторы, йә кандидаты. Уларҙың күбеһе новаторлыҡ эшмәкәрлеге менән шөғөлләнә. Күптәренең проекттары бөгөндән беҙҙең медицина киләсәгенә ҙур өлөш индерә. Бөтә ҡатнашыусылар ҙа ҡыҙыҡлы социаль проекттар тәҡдим итте. Беҙ 100 кешене финалға һайлап алдыҡ. Һынауҙарҙан һуң 30 кеше был специализацияла еңеүсе тип табыласаҡ. Уларҙың унауһы “Рәсәй лидерҙары” конкурсының суперфиналына үтәсәк”, – тине ул.

Шулай итеп финалға Башҡортостандан дүрт кеше сыҡты. Улар – Динар Ғабдрахманов (“Мать и Дитя” клиник госпитале), Гөлнара Иҙрисова (Республика кардиология үҙәге), Артем Изосимов (Башҡорт дәүләт медицина университеты) һәм Богдан Олейник (Республика кардиология үҙәге).

Яҡташтарыбыҙға был мәртәбәле бәйгелә уңыштар һәм еңеү теләйбеҙ!